«Саскавий» марий ӱдырамаш ушемым таче ик эн пашаче марий организацийлан шотлаш лиеш

«Саскавий» марий ӱдырамаш ушемын куд ий пашам ыштыме жапыштыже икымше гана 6 февральыште ушемын иктешлыме-сайлыме погынымашкыже чумыргышо калык вуйверым да тергыше комиссийым гына сайлен, а вуйлатышым ойыраш у вуйверлан ӱшанен. Тыге вуйверыш индеш еҥ пурен, нунын кокла гыч кумытшо - Людмила Кошкина, Светлана Бочкарёва, Анфиса Эманова - тышке икымше гана логалыныт. Вуйверын моло еҥыштымат ушештарем: Галина Ширяева, Галина Шкалина, Маргарита Тойшева, Зинаида Александрова, Эльвира Куклина. Ираида Степановалан ынде «Саскавий» вуйлатышын сомылжым ӱшанен пуэныт. Тыгак вес у ошкылым ыштыме: вуйвер пелен район совет шочын. Тушко таче «Саскавийын» кум районысо пӧлкаж гыч еҥ-влак ушненыт: Кужэҥер гыч Ольга Петухова, Оршанке гыч Надежда Лежнина, Провой гыч Ольга Майкова. А тергыше комиссийыш пуреныт: Лидия Ильина, Надежда Казанцева, Ольга Веденкина.

Марий ӱдырамаш ушемын погынымашкыже 50 утла еҥ Йошкар-Ола, Кужэҥер, Оршанке да Провой кундем гыч толын, пӧръеҥ-влакат лийыныт. Тӱвыра, печать да калык-влак паша шотышто министрын алмаштышыже Александр Луночкин чолга марий ӱдырамаш-влаклан – Лидия Ильиналан, Галина Михайловалан, Римма Пальцевалан, Маргарита Тойшевалан – «Калык верч тыршымаш» медальым кучыктен. Марий Оньыжа Анатолий Иванов Марий Элысе Кугыжаныш Погынын Тауштымашыж дене Зинаида Александровам, Кугыжаныш Погынын Чап кагазше дене Нина Орманым палемден.

Паша радам дене келшышын, погынымаш годым 2008-2013 ийлаште «Саскавийым» вуйлатыше Галина Ширяева ушемын кок идалыкысе сомылжым иктешлен. Тудын докладшым фотопрезентаций пеҥгыдемден.

Чынжымак, «Саскавий» ӱдырамаш ушем ятыр оҥай да кӱлешан проектым илышыш шыҥдарен шога. Теве ӱмаште «Немда тӱҥалтышлан вуйсавыш» акций, «Мый улам марий ӱдырамаш» усталык кас лийыч, «Ший Пампалче» лӱман у пайремым шочыктышт. Тудыжым Марий ӱдырын вуешшумо кечыже манын, 23 октябрьыште палемдаш темлат. Тиде самырыктукымым шке веке савырыме да марий йӱлам тукым гыч тукымыш кусарыме амал дене ышталтеш. Самырык-влак дене тыгак тӱрлӧ вашлиймаш эрта. Теве Самырыктукымын Россий кӱкшытан V слётышкыжо «Саскавий» ушем посна нугыдо пограмме дене миен коштын.

Тиддеч посна «саскавий-влак» районлашке лектыт, тусо ӱдырамаш-влак дене кылым ышташ тыршат. 2013 ийыште Кужэҥер, Звенигово, Курыкмарий, Шернур районлаште лийыныт.

Вес сомыл-влак – тале марий ӱдырамаш-влакым шочмо кече, лӱмгече дене саламлымаш, нунын лӱмыштым тӱрлӧ семын чапландарымаш, чолга ӱдырамаш-влакым тӱрлӧ награде дене суапландараш йӧным кычалмаш, моло мер организацийын пашашкышт ушнымаш.

2014 ият у проектлан поян лийшаш. Мутлан, «Ӱдырамаш да пеледыш» конкурс, «Мелна пайрем», пӱртӱсын тӱрлӧ шудо-саскаж дене эмлалтын моштышо-влак дене вашлиймаш, самырык-влак дене «Паша илышлан туныкта» мутланымаш… Тӱҥалме сомылымат умбакыже шуена.

Автор: Эльвира Куклина.