ТӰВЫРА: "Юмынӱдыр" нерген

Вход на сайт

Кодшо ийын октябрь тылзыште М.Шкетан лӱмеш Марий национальный драме театрыште «Юмынӱдыр» икымше марий мюзиклын премьерыже эртыш. Тудым вара Саранскыште Финн-угор калык-влакын IX "Майатул" фестивальыштыштат палемденыт. Шукерте огыл мюзикл «Театральный Йошкар-Ола» фестивальыште гран-прим сеҥен налын.

Мюзиклыште марий калыкын ик эн мотор мифшым почын пуымо: Юмынӱдыр ден мландӱмбалсе марий рвезын ваш йӧратымашыштым. Тидлан йӧнымат оҥайым мумо. Да, ты йӧн руш да тӱнямбал сымыктышыште у огыл, но марий сымыктышыште кучылдымо гай чучеш. Тыге, сюжет почеш, кок самырыкъеҥ эртыше жапыш вучыдымын (кӱсотым руаш толмекышт!) логалыт. Иктыже, Салий (Санёк), кугезына-шамычын илыме жапыштышт Юмынӱдырым йӧратен шында…

Рвезе-влакым тусо илыш тӱрлӧ семынат терга. Йӧратымаш ден ужмышудымаш, келшымаш ден икте-весым ужалаш тӧчымаш, поян лияш шонымаш дене аҥыргымаш… Но чын чон шижмаш, порылык сеҥат.

Марий калык – икоян калык. А тиде шонымаш мюзиклыште тӱҥ верым налеш. Оҥайын да шонаш таратышын Онапу (кӱсотысо тӱҥ пушеҥге) йыр действий вияҥеш. Шке калыкым, йӱлам йӧратыме кумылым пытартыш сцене путырак ылыжта. Чынак, ик воштырым тодылаш куштылго, а кӱжгӧ пушеҥгым руашат неле.

Тиде пашашке вий-куатыштым пыштеныт:
Марий Элын сулло пашаеҥже Юрий Русанов - проект вуйлатыше;
Олык Ипай лӱмеш Марий кугыжаныш премийын лауреатше Наталья Пушкина - проект да сценарий автор;
Олык Ипай лӱмеш Марий кугыжаныш премийын лауреатше Светлана Яндукова – композитор;
Марий Элын сулло артистше Роман Алексеев – режиссёр-постановщик…

Тӱҥ рольым модыт:
Юмынӱдыр – Марий Элын сулло артистше-влак Светлана Строганова ден Алина Егошина;
Санёк, Салий – артист-влак Виктор Апталиков, Павел Ефимов, Марий Элын сулло артистше Сергей Данилов.

«Театральный Йошкар-Ола» фестивальыште сеҥыше-влак нерген тыште лудаш лиеш - http://shketan.ru/mari/component/content/article/417--lyr-l-r-

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.