Кийыме мландыда пушкыдо лийже, Валерий Яковлевич Очеев

2015 ий 30 ноябрьыште марий калыкын чолга еҥже, книгам савыктыше, журналист Валерий Яковлевич Очеевын шÿмжö вучыдымын кырымым чарнен. 5 декабрьыште тудын дене курымеш чеверласышт. Лишыл еҥже-влаклан, родо-тукымжылан, йолташыж-шамычлан «Арслан» интернет-журнал кугу чаманымашым ойла. Чынже денак, поро да волгыдо кумылан лийын, тидым мыламат, журналист Эльвира Куклиналан, шижаш логалын. Шарнем, «Марий Эл Радиошто» ыштымыж годым ятыр гана вашлияш да журналист сомылым пырля ворандараш куштылго лийын. Тау, пагалыме Валерий Яковлевич.

Валерий Яковлевич Очеев 1967 ий 26 сентябрьыште Параньга район Олор ялыште колхозник ешыште шочын. 1984 ийыште Олор кыдалаш школым тунем пытарен. Вара армийыште служитлен. Икмыняр тат ял озанлыкыште пашам ыштен. ВЛКСМ Марий Турек райкомыш инструкторлан налын. Кок ий тыршен, орготдел вуйлатыше марте кушкын. Тиде районыштак «Знамя» газетыш куснен. 1991 ий гыч «Кугарня» газетыш толын. Кум ий жапыште корреспондентлан, ответственный секретарьлан, тÿҥ редакторын алмаштышыжлан ыштымеке, Параньга посёлкыш пӧртылын да «Марий эрвел» газетым лукшо группын вуйлатышыже лийын. Журналист мастарлыкшым «Марий Эл» газетыште, республикысе Госсанэпиднадзорын пресс-службыштыжо шуарен. «Пульс-Радио-Йошкар-Ола» радиостанцийыште марий передаче-влакым ямдылен. Ик жап Медведево районысо «Вести» газетын тÿҥ редакторжо лийын. Марий радиошто «Кечывал кечын» передачын вӱдышыжлан ыштымеке, «Марий Эл Радиош» куснен. Радио гыч кайымеке, ятыр авторлан книгам лукташ полшен.

Кийыме мландыда пушкыдо лийже, Валерий Яковлевич. Поро паша огеш мондалт. Те марий калыкын эртыме корнешыже посна кышам коденда.

Фото: журналист Валерий Очеев ден профессор Иван Иванов.