2015 ий ага тылзын 9 кечынже Морко район Дигин ялыште Кугу Сеҥымашлан 70 ий теммылан пöлеклалтше пайрем эртыш. Сеҥымаш кечым нигöат нигунамат мондышаш огыл! Да Российысе кажне ешыште тиде пайремым ик эн кугулан шотлышаш улыт. Марий калыкынат чоныштыжо шучко сар келге кышам коден, огына мондо нигунам совет калыкын шуктымо подвигшым. Ме сеҥымашлан надырым пыштыше-влакын патриотизмыштым, патырлыкыштым да лÿддымылыкыштым шарнен мланде марте вуйнам савена.

Дигин ял гычат 41 еҥ сöй пасушто тыныс илыш верч уло вийым пыштен, шке илышым чаманыде кредалын. Нунын кокла гыч 13-шо мöҥгеш пöртылын огыл. Ял калык, нуным шарнен, Сеҥымашын 70 ияш лÿмгечыжлан шарнымаш оҥам почын. Мутат уке, кугу сарын тул лоҥгаштыже вуйым пыштыше патыр-влакым эреак шарнышаш улына.

Кеч-могай пашаштат вуйын шогышо еҥ лийшаш. Дигино ялыште чолга, мастар, йöным муын моштышо айдеме - Александр Васильевич Дигин. Шарнымаш оҥам почаш, тиде пайремым эртарен колташ чот полшен. Тудо самырыктукымым кугезына-влакын йӱлаштым аклаш, пагалаш туныктен шога. Шочмо ял калыкшылан поро да улан илышым, вуй ӱмбалне тынысле кавам уло кумылын тылана.

Тиде сылне Сеҥымаш пайремышке Весьшÿргö клуб коллективат ушнен. Нуно Дигин ял калыклан сай концертым ончыктышт. Чапле пайрем концертым клуб вуйлатыше Роза Васильевна Келушева да тудын полышкалшыже-влак Елена Алексеевна Александрова ден Эльвира Ивановна Григорьева ямдыленыт. Концерт программе коклаште ялын ветеранже-влакым Сеҥымаш кече дене саламлышт. Раисия Семёновна ден Софья Ивановналан РФ президент Владимир Путин деч шергакан саламлымаш серышым кучыктышт.

Умбакыжат калыкна, тукымна патыр, чолга да лӱддымö лийже. Илышна пеледалт шогыжо. Чыланат таза лияш. Ӱмырда кужун-кужун шуйныжо, таче мемнан дене пырля улшо пагалыме ветеран-влак!

Автор: Христина Иванова, этножурналист школын еҥже.

• 70 лет со дня Победы

Икымше лаштыкыш пöртылаш>>>