Паша айдемым сӧрастара

Вход на сайт

638_0.jpgПаша айдемым сӧрастара, а ура чонан еҥ кеч-могай пашамат ворандара. Марий Оньыжа, Марий Элысе Кугыжаныш Погын вуйлатышын алмаштышыже Анатолий Николаевич Иванов 4 сентябрьыште шочмо кечыжым палемда. Тиде кечын тудым шуко йолташыже, палымыже да палыдымыжат саламлаш вашкена. Вет, чынже денак, поро чонан Морко эрге шочмо марий калыкшылан ятыр полшен шога: кеч-кунамат посна еҥын илыш пӧрдемжым умылен мошта, кертмыж семын неле-йӧсым сеҥаш йӧным кычал муэш.

Анатолий Иванов Морко район Изи Корамас ялыште шочын-кушкын. Кӱшыл шинчымашым А.М.Горький лӱмеш Марий политехинститушто налын, Горькийысе кӱшыл парт школым пытарен. Паша корныжо Марий машиностроитель завод гыч тӱҥалын. Вара армийыште служитлен. КПСС-ын Йошкар-Оласе горкомыштыжо пропаганде да агитаций пӧлкам вуйлатен, Калык депутат-влакын Йошкар-Оласе совет председательын алмаштышыже лийын. Российысе Сбербанкын «Марий Эл» банкыштыже пӧлкам вуйлатен. Марий Эл Президентын Администрацийыштыже тыршен. Марий Эл тӱвыран сулло пашаеҥже лӱмым сулен.

Мер Каҥашын еҥже-влак Анатолий Николаевичым сылне пайремже дене шокшын-шокшын саламлена да пеҥгыде-пеҥгыде тазалыкым, волгыдо вий-куатым, шӱм-чон ласкалыкым, эреак кугу-кугу пиалым, сеҥымашым, кужу-кужу ӱмырым тыланена. Пагалыме Анатолий Николаевич, умбакыжат марий калыклан ӱшанле эҥертыш лийын кодса!

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.