Токтар Онар тукым 220 ийым палемдыш. Токтар Онар лÿмеш стелым почо (фото, видео)

Вход на сайт

16 августышто Токтарсола ял (Марий Эл Республик У Торъял район) 220 ияш лÿмгечыжым палемдыш. Тиде кечын ялыш пурымашке Токтар Онарлан палым – стелым – почыч.

Ӱжарам айдеме волгалта. Тыге каласен ик почеламутыштыжо поэт Геннадий Сабанцев. Токтарсола кундемын ÿжаражым Онар лÿм волгалтен шога. Тиде лÿм пелен моло еҥынат йÿлаш, у деч у пашам ворандарен колташ кумылжо лектеш.

Теве ожно ты кундемыште Даниил Ильич Онар школ пашалан тӱҥалтышым пыштен. Кызыт ынде калык, сай пашалан тауштен, школлан да кӱварлан тудын лӱмжым пуэн. А туныктымо, самырыктукымым сай корныш шогалтыме сомылым весе-влак умбакыже шуят. Мутлан, школ директор, чолга мер пашаеҥ, "Онар пале" проектын авторжо Евгений Викторович Небогатиковым налаш. Йырже поро, пашаче еҥ-влакым чумырен мошта, у деч у шонымашым илышыш шыҥдараш йӧнымат муэш. Шарналтена, Токтарсола школышто Марий самырыктукымын Россий кӱкшытан IV слётшо эртыш. Верысе калык, школ коллектив тӱрлӧ кундем гыч толшо ӱдыр-рвезе-влак чонышто поро кышам коденыт. А уна-влакым вашлияш ямдылалтме годым ыштыме фонтан тачат школ кудывечым сӧрастара.

Палемдыман: Токтар Онарлан стелым ышташ 54 тӱжем теҥге каен, 34 тӱжемжым Марий Эл правительствын верысе шонымашым илышыш шыҥдараш полшышо проектше гоч ойырымо, молыжым администраций пыштен, верысе калык, спонсор-влак пуэныт.

Токтарсола ялын шочмо жапшылан 1794 ийым шотлат. Таче тыште 121 сурт уло, 422 еҥ ила.

Пайрем годым эн илалше еҥым - Окавий Николаевна Рябининам (84 ияш) да Екатерина Иосифовна Якимовам (82 ияш) - саламлышт. Эн изи ньога-влакымат палемдышт: 11 августышто Шишкинмыт ешыште йыгыр ӱдыр шочыныт. Шукерте огыл Снежана ден Александр Глушковмыт ешым чумыреныт - нуныланат пӧлекым кучыктышт.

Пайрем программым верысе мурызо-влак Ольга Богачёва, Татьяна Фоминых, Ольга Куклина, Алёна Таныгина, Николай Любимов, "Ош йӱксӧ" ансамбль сӧрастареныт. Тыгак спорт модмаш кумылан-шамычым йыр чумырен. Кастене дискотеке лийын. Тушто Татьяна Соловьёва, Виктория Тихонова, Вадим Краснов, Артур Ефремов муреныт.

А калык ой почеш, ожно, моткочак ожно, кумда Юл эҥерын шола серыштыже, иленыт шоҥго аваж ден коктын Онар лÿман патыр рвезе. Тудо пеш кугу капан патыр лийын. Кугыжа эрге дене кредалмаште шке вийжым ончыктен. Кугыжан эрге тудлан шуко оксам сöрен, Юл вес велысе шке мландыжым пöлеклаш товатлен гынат, Онар шке шочмо кундемжым огеш ужале. Онар шке калыкшым пагален, калыклан полшен шоген. Вес тÿняш каймекыжат, марий калыклан неле пагытыште полшаш сöрен. Тыгаяк кугу капан, калыкшым аклыше лийын туныктышо Даниил Ильич Ильин, сандене тудым Онар маныныт, ончыкшым чолга еҥ Онар фамилийымак налын.

Автор: Эльвира Куклина.

IMG_9376.jpg

IMG_9380.jpg

IMG_9412_0.jpg

IMG_9415_0.jpg

IMG_9419.jpg

IMG_9421.jpg

IMG_9435.jpg

IMG_9444.jpg

IMG_9467.jpg

IMG_9485.jpg

IMG_9503.jpg

IMG_9517.jpg

IMG_9526.jpg

IMG_9527.jpg

IMG_9539.jpg

IMG_9550.jpg

IMG_9553.jpg

IMG_9556.jpg

IMG_9584.jpg

IMG_9589.jpg

IMG_9623.jpg

IMG_9627.jpg

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.