Мер Каҥаш – Форум эртен: Идалык лӱмгечылан поян

Вход на сайт

Российын индеш регионжо да Марий Элын чыла гаяк районжо гыч 200 наре марий еҥ Мер Каҥашын «Марий форум: шошо сессийышкыже» чумырген ыле. Мероприятий 24-25 апрельыште Йошкар-Олаште эртыш.

IMG_1421-.jpg

Икымше кечын кечывал марте форумыш погынышо-шамыч «Марий тоштыйӱла тӱвыран шӱлышыжӧ да йодышыжо-влак» Регион-влак кокласе шанче-практик конференцийыште участвоватленыт. Тыге Калык усталык да культурканыш паша шотышто республикысе шанче-методик рӱдерын эртарыме конференцийжын «Калык тӱвыра аланыште мер паша» секцийыштыже ятыр доклад йоҥгалтын.

Тунам Свердловск кундемысе Екатеринбург олаште шочшо «Урал кундем» у марий мер организаций нерген, Санкт-Петербургышто да Ленинград областьыште улшо марий мер организацийын пашашт нерген, Озаҥ олаште шочшо «Лай мардеж» у марий самырыктукым организаций нерген каласкаленыт. Тыгак марий калык йӱлам шарымаште да йылмым вияҥден колтымаште Интернетын йӧнжым кучылтмо нергенат ойленыт.

Тиде кечынак тренинг-влак кугурак да самырык-шамычлан посна лийыныт.

IMG_1455-.jpg

Пеледыш пайремым але Семыкым палемдаш? Тиде йодыш шотыштат кугу мутланымаш тарванен. Мучашлан тыгай ойыш шуыныт: йӱла дене кылдалтше да светский пайрем-влакым лугыман огыл, а Пеледыш пайрем – марий калыкым ушышо ик эн тӱҥ пайрем. Тыгодым кӧ Семыкым кумдан эртара гын, тек умбакыжат эртарышт.

Кокымшо кечын Мер Каҥашын пленумже эртен. Оньыжа Анатолий Иванов IX Марий калык погын деч вара Мер Каҥашын ик ияш пашажым иктешлен, ончыкылык паша радам дене палдарен.

Пленум кышкарыште лӱмгечан мероприятий-влаклан кузе ямдылалтме нергенат ойлышт. Вет тений Пеледыш пайремын шочмыжлан 90 ий темеш. А тиде пайрем Йошкар-Олаште 15 июньышто лиеш.

Тыгак писатель Сергей Чавайнын шочмыжлан 125 ий темеш, а мер пашаеҥ Иван Петровлан – 120 ий. Ты шотыштат шуко сай сомыл ворандаралтеш. Иктым гына палемден кодымо шуэш: Чавайнын лӱмгечыжлан пӧлеклалтше «Калык верч тыршымаш» медаль ямдылалтеш. Тудо 100 штука гына лиеш да эн тале марий еҥ-влаклан логалшаш.

Теве эше мом палемдыман: 1 июньышто Советский район Ӱшнӱр школышто йоча-влакын икымше Пеледыш пайремыштым эртараш шонат.

IMG_1420--.jpg

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.