Марий Эл - Олимпиадыште. Спортсмен огыл гын, артист-влак шочмо кундемын чапшым аралат (фото, видео)

Вход на сайт

2014 идалык Российлан Сочиште эртыше XXII телымсе Олимпийский (7-23 февраль) да XI телымсе Паралимпийский (7-16 март) модмаш-влак дене историеш кодеш. А Марий Эл Республикын эртыме корнешыже Модмаш нерген шарнымашым спортсмен-влак огыл, а артист-шамыч возат. Сочиште Я.Эшпай лӱмеш марий кугыжаныш филармонийын кок коллективше - «Марий Эл» кугыжаныш куштышо ансамбль ден «Марий кундем» калык семӱзгар оркестр - участвоватленыт.

hLDx2D7Gk6I.jpg

Ансамбль-влак Олимпийский олан ик эн кумда сценылаштыже шке мастарлыкыштым ончыктеныт, марий да моло калыкын семже дене спортсмент-влакым кумылаҥденыт. Нуным тушто ончаш толшо-влакат аклен кертыныт. Тыге «Марий Эл» ансамбль кок кугу концерт дене куандарен: «Лаура» ече дене таҥасымаш да биатлон рӱдерыште да теҥыз воктене. Эше артист-влакым поро кумылым ончыктышо концертыш ӱжыныт. Тудыжо нунын илыме «Принцесса Анастасия» лайнерыште эртен.

I0zLPsBsRTc.jpg

Кузе палемдат артист-влак, Олимпийский модмаште Марий кундем гычат ятыр еҥым ужыныт, нунын дене мутланеныт. Чылаштымат Сочи ола шке моторлыкшо дене ӧрыктарен. Спорт объект-влакат сылне да ӱшандарыше улыт. Нуно Сочи воктенысе пасушто нӧлталт шогалыныт.

7SDUrx0NPS4.jpg

Палемдыман, телымсе Олимпийский модмаш икымше гана Российыш толын лектын. А 1980 ийыште Москошто кеҥежымсе Олимпийский модмашым вашлийыныт. Тушкат миен коштын «Марий Эл» ансамбль.

7yeLzFszsXU.jpg

Ты кок Олимпиадын тӱвыра программыжым таҥастараш гын, кызыт модмашым почмаш да петырымаш годым гына пайрем кумдан гӱжлен, варажым посна тӱвыра площадке-влак пашам ыштеныт. Кодшо курымын 80-ше ийлаштыже «Марий Эл» ансамбль Олимпиадыш 64 еҥан состав ден миен, тушто ик тылзе илен да кумда программыште шке мастарлыкшым ончыктен. Кызыт Сочи олаште 18 еҥ лийын, ныл кече илен, посна площадкылаште мастарлыкшым ончыктен. Шийвундо шотыштат, тунам артист-влаклан федерал кӱкшытыштӧ полшеныт гын, таче республик кӱшеш миен толыныт. Но Сочи нерген ушештарыше шокшо вургемым, тÿрлö сувенирым пöлекленыт.

100_4156-.jpg

«Марий Эл» ансамбль Сочиш тӱрлӧ эл гыч чумыргышо-влакым марий калыкын фольклоржо дене палдарен. Тудо «Ой, луй модеш», «Морко сӱан», «Арбор каче-влак» да моло марий куштымашым ончыктен. Музыкант, композитор Сергей Пчёлкин гармонь сем почеш ончышо-влакымат кушташ таратен. Сочи мучко Марий Элын сулло артистше Зоя Берникован мурыжо йоҥгалтын.

Тӱрыс ончалмаште Сочисе Олимпийский модмашын тӱвыра программыже моткоч поян лийын. Чылаже кум тӱжем мероприятий кум миллион ончышым чумырен. Элнан кажне регионжо шке мастарлыкшым ончыктен, тыгодым тӱрлӧ калыкын тӱвыраж дене палдареныт. Марий ансамбльымат моткоч шокшын вашлийыныт, марий артист-шамыч организатор-влакымат калыкнан костюмжо, «тывырдыкше» дене ӧрыктареныт.

«Марий кундем» калык семӱзгар оркестрынат кажне артистшылан Сочисе Паралимпиадыште эртыше ныл кече мондалдыме кышам коден. Нуно марий калыкын тӱвыраж дене ныл вере палдареныт: тиде - Олимпийский паркын «Экспозиция регионов» сценыште да почмо площадкыште, Олимпийский ялыште да, эн тӱҥжӧ, сеҥыше-влаклан медальым кучыктымо годым Medal Plaza сценыште.

IMG_3266-.jpg

Калык семӱзарым шоктымышт, Марина Царегородцеван мурымыж почеш тӱрлӧ йылман, тӱрлӧ тӱвыра дене кылдалтше еҥ-влак куштеныт, кидсовыш дене куандареныт.

IMG_3278-.jpg

Чынже дене, тыгай Олимпиадыш логалаш – кугу пиал. Тидым палемден кажне артист. Сочи олашке миен толмаш артист-влаклан шерге пӧлек лийын, вет тений «Марий кундем» оркестрлан 30 ий темеш. Ты лӱмгечым тудо Марий кугыжаныш филармонийын кокымшо ий почела эртарыме «Шошо Йошкар-Ола» сымыктыш фестиваль кышкарыште 31 мартыште шочмо Йошкар-Олаште палемда. А фестиваль премьере гыч тӱҥалеш. 26 мартыште Марий Эл главан грантше полшымо дене «Марий кундемын сӱретше-влак» хореографий спектакль лиеш.

IMG_3293-.jpg

PS: Тидат оҥай, «Сочи 2014» Олимпийский тулын эстафете историйжым ончалаш гын, тудо тений моткоч кумдан эртен: элнан 2 900 илыме верыштыже Калиниград гыч Владивосток марте лийын.

Тыгак тунемме вер-влак пелен 26 волонтёр рӱдер ышталтын. Шке кумылын Олимпийский модмаш годым пашам виктараш 21 млн. еҥ полшен.
Кугу спорт модмаште 88 эл гыч кум тӱжем наре спортсмен таҥасен. Чылаже 98 медаль комплектым модыныт, ик тӱжемат 300 медальым ямдыленыт. Тушеч 33 медальжым (13 шӧртньӧ, 11 ший, 9 той) Россий сеҥен налын да икымше верыш лектын.

Паралимпийский модмашке 45 эл гыч 555 спортсмен ушнен. Российын командыже пӱтынь тӱням ӧрктарен: 80 (30 шӧртньӧ, 28 ший, 22 той) медальым суленыт. 80 медаль – телымсе чыла Паралимпадын рекордшо, 30 шӧртньӧ – историийыште кокымшо лектыш.

Автор: Эльвира Куклина.

ifmWKDi5LNA.jpg

5cm9P1cjQnA.jpg

bU5wPPe7UPw.jpg

Lcsa3zuLeiY.jpg

neaYsXvHvoU.jpg

V2JCpfBaczA.jpg

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.