У ТУКЫМ - Марий студент-влак воштылтеныт, шортареныт…

Вход на сайт

Кажне ийын Марий Кугыжаныш университетыште «Студент шошо» фестиваль эрта. Тушто студент-влак усталык мастарлыкыштым ончыктат. Тений тиде конкурс 1 апрельыште тÿҥалын. 9 апрельыште Финн-угор институт выступатлен.

Тенийысе фестивальын тÿҥ темыже универсиадылан пöлеклалтын, но марий институтысо студент-влак шке программыштым уста марий писатель С.Г.Чавайн дене кылденыт. Вет сылнымутмастарлан 2013 ийыште 125 ий темеш.

Тыге студент-шамыч драматург Геннадий Гордеевын «Сергей Григорьевич Чавайн» пьесыжлан эҥертеныт. Чонеш логалше, шонаш таратыше сценке ончаш толшо да жюри член-влакын шинчавÿдыштымат луктын. Кажне участник шке рольышкыжо пурен. Тыге Чавайнын илышыжым эше ик гана илен лектын.

Тыгодым сценке оҥай да весела номер-влаклан поян лийын. Мутлан, марий кадрильым эше ик ганат тиде фестивальыште ужын огытыл. Калык совым шокшын кырен вашлие да уло кумылын воштыльо.

Тунемше-влак изирак да оҥай видеороликым ончыктышт, пуйто вес эл гыч самырыкеҥ-шамыч Йошкар-Олаш турист семын толыныт да ола мучко куршталыт, ик машинаш иканаште 16 еҥ дене шинчыт.

«Марий мурсем» ансамбльын ÿдыржӧ-влак Марий Эл тÿвыран пашаеҥже, композитор Родион Алексеевын «Мый палем, молан» мурыжым кок йÿкын йоҥгалтареныт. Ныжыл куштымаш, «Ото» почеламутым шергылтарымаш, «Тÿжем денат» калык мурым акапельно йоҥгалтарымаш, «Марий ÿдыр» да «Тылат» эстраде муро-влакым мурымаш – чылажат ончышо-влаклан шуко жаплан шарнаш кодын.

Каласыман: программе тÿрыснек марий йылме дене лийын.

А «Студент шошо» фестивальын гала-концертше 23 апрельыште (18 шагатлан) Сеҥымашын XXX идалыкше лӱмеш тӱвыра полатыште эрта.

Автор: Людмила Карпова.

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.