Юлтехыште Марий тÿвыра кече

Йот студент-влак дене мутым вашталтыме годым ятыр гана колаш логалын: «Марий Элыште илена, а марий калык нерген нимат огына пале. Шке элыш миен, палыме-влак марий калык нерген йодыт, а ме нимат каласен огына керт». Ик тыгай вашлиймаш деч вара марий калык дене палдарыме касым эртараш шонымаш шочын.

Тыге, 2017 ий 14 декабрьыште Юл кундемысе кугыжаныш технологический университетыште «ИНТЕЛЛЕКТУАЛ» тÿвыра-увер рÿдерын чолга еҥже-влак вашлиймашым эртарышт. Тиде погынымашыш 100 утла тунемше толын, эсогыл верысе студент-влакат шке кумылын толын лектыныт.

Толшо уна-влакым Марий Элын да марий калыкын историйже дене палдарыме, нунылан марий кочкыш, марий тÿр, вургем нерген каласкалыме, презентаций гоч ончыктымо. Марий семÿзгар нерген уверым колыштмеке, ÿдыр-рвезе-влак кÿслем, шÿвыр ден тÿмырым шке шинчашт дене ужыныт.

«Лира» сымыктыш школ (Бауман лицей) гыч Фёдор Сарамбаев туныктышыжо Людмила Плотникова дене пырля кÿсле дене шокталтеныт. Нунын шоктымышт почеш Софья Мусатова, Анна Сергеева да Марий Петухова сылне мурым муралтеныт.

М. Шкетан лÿмеш марий кугыжаныш драме театрын артистше-влакат марий шÿлышым пуртеныт. Сергей Данилов шÿвыр дене шокталтен, Эдуард Яковлев тÿмырым пералтен, а Олег Кузьминых калык мурым йоҥгалтарен.

Марий калык мурым мурызо Алёна Яковлеват шергылтарен. Тыгак тудо марий модышым эртарен.

Юлтехыште эртыше Марий тÿвыра кече студент да туныктышо-влакын ушешышт сай да кужу кышым коден манын, ÿшаныме шуэш. Тыгай вашлиймаш-влакым умбакыжат эртараш кÿлеш!

Автор: Вероника Мустаева.
#МариАрслан #ПГТУ #НациональныйВопрос #Молодёжь #Волгатех #МарийЭл