Пӱртӱсын пӧлеклыме вий-куатше

«Ӱдырамаш пойдара, ӱдырамаш йомдара», - калыкыште ожнысек тыге ойлат. Кеч эртыкым але тӱнямбалсе религийым ончалаш, кеч сылнымутым але живописьым налаш - чыла вере ӱдырамашлан посна вер да кӱкшыт ойыралтеш. Южыжо ӱдырамашын вийжым юзо вий дене таҥастара. Молан? Иктаж-кунам шоналтенда?

«Ӱдырамаш вий-куат». Тыге лӱмдалте «Илыш куан» ÿдырамаш клубын черетан вашлиймашыже. Тудо 31 октябрьыште Калык-влак кокласе кылым вияҥдыше да граждан обществылан полшышо ресурс рÿдерыште эртыш. Тиде кече арам огыл ойыралтын.

«Тылзе кушмо 13-шо кече - тыгай вашлиймашлан моткоч келшен толшо кече», - палемдыш вашлиймашым виктарыше Эльвира Куклина.

Да ойырымо темыжат арам лийын огыл. Эльвира шукерте огыл Кипрышке кумдан палыме психолог Лариса Ренарын эртарыме курсышкыжо миен коштын. Тушто налме опытым да шинчымашым уна-влаклан уло кумылын каласкалыш.

Вашлиймаш годым икмыняр оҥай тема-влакым тарватыме: ме шкенан кугезе тукым-вожнам палышаш да тиде вийым кузе аралышаш улына? Тыште ача-ава да икшыве-влак кокласе кыл нерген пайдале ой-каҥаш-влак ятыр йоҥгышт. Куандара, кызытсе самырыктукым шке тукым-вожшым шымла да палаш тырша манын, палемдышт толшо-влак.

Умбакыже мутланымаш ӱдырамашын вий-куатше нерген тарваныш. Кызытсе илышын вашкыше толкыныштыжо, тӱрлӧ паша да сомыл коклаште ӱдырамаш шкенжым кӧргӧ вийжым кузе пойдарыме нерген палена мо?

Ӱдырамаш - ава, пелаш але шкет улшо... Чылажат мемнан кидыште! Лач изи гына шылтык (секрет)-влакым палыман. Чыла тиде кончышым кугезына-влак умыленыт да паленыт, а кызыт ӱдырамашлан пӱртӱс деч пуалтше вий-куатым тӱнямбал кӱкшытыштö шымлат, тунемыт да илышыште кучылтыт.

Тиде кечын толшо уна-влак йолташ але ик еш гае лийыч, сылне мурым йыр шогалын муралтымеке, тамле команмелна дене сийлалтыч. Чынже денак, вий-куатым икте-весышт деч налын кайышт!

Мучашлан палемдыме шуэш, ӱдыр да ӱдырамаш-влак, шке чын тӱсдам ида мондо, шыма да поро лийза. Куаныза я шортса - чылажат чон почын. Аралыза еш тулотым. А, пöръеҥ-влак, аралыза мемнам!

«Илыш куан» ÿдырамаш клубын вес вашлиймашыже 30 ноябрьыште лиеш. Тунам тыгай темым нöлталыт: «Йыр пöрдмашын шылтыкше (секрет)».

Организатор-влак: «ИНТЕЛЛЕКТУАЛ» тÿвыра-увер рÿдер ден «Саскавий» марий ÿдырамаш ушем. Вашлийме вер: Йошкар-Ола, Йошкар Армий урем, 41-ше пöрт, 407-ше пöлем. Лекше йодышым рашемдаш телефон: 8-999-145-38-76.

Автор: Алёна Яковлева, Самырык этножурналист школын участникше.
#МариАрслан #РесурсныйЦентр #ШколаЛидераНКО #Тренинг #Семинар
#НКО #Активист #ИлышКуан_РадостьЖизни #Мастер_класс
#Рукоделие #ЦентрРазвитияГармонии #Саскавий #МарийЭл #Мари