IX марий самырыктукым слёт мучашлалтын. Кузе тудо эртен?

2017 ий 4-10 июль. Марий Эл Килемар район Церкысола (Арда) села. Ӱдыр-рвезе-влак жапым пайдан эртареныт: шуко уым пален налыныт, ятыр шонымаш шочын, мутат уке у йолташ-влакым муыныт, да тӱвыра программат нуным шуарен.

Шинчамаш могырым ончалаш гын, ятыр кӱлешан вашлиймаш-влак лийыныт. Кажне вашлиймаш деч вара лончылымо теме шонаш таратен. Мутлан, Марий Элысе тÿвыра, печать да калык-влакын пашашт шотышто министерстве гыч Игорь Садовинын вÿдымö «Брендинг территорий» тунеммаш. Тыште слётын участникше-влак шочмо верышт нерген возеныт. Тыге возымаште ял але села нерген шуко оҥайым пален налаш лиеш. Чыла вере иктаж-могай гынат пӱртӱс сӧраллык уло, мемнан кугезына-влак арам огыл шке илемыштым тыгай верыште шындаш тыршеныт.

Кызытсе илышыште кугу верым айлыше проект паша нерген умылымашат ӧрдыжеш кодын огыл. Эн ондак Марий Элысе тÿвыра, печать да калык-влакын пашашт шотышто министерстве гычак Алёна Иванова проект чоҥалтме нерген каласкален. Кеч тидын нерген шуко ойлат гынат гынат, садак кажне гана ала-мом уым пален налат. Умбакыже илышыш шыҥдаралтше проект дене палдареныт: Маргарита Маланова «Финно-угор лагерь» дене, Татьяна Япаева «Эко-культура» форум дене, Алёна Иванова «УнчоFest» дене да Евгения Матюкова «Пятнадцать достопримечательностей города Козьмодемьянск» дене.

«Генерирование бизнес идей» семинарым бизнес тренер Татьянав Лебедева эртарен. Тыште слётчик-влак кушеч идейым налаш, мом ышташ да кузе илышыш пурташ манын шонкаленыт. Семинарысе мутланымаш яра кодшаш огыл, садланак тиддеч вара бизнес квест эртен. Тыште лужа-влак шонымо проектыштым кагазеш сӱретленыт, презентацийым ямдыленыт.

Экологий идалыклан пӧлеклалтше мероприятият ӧрдыжеш кодын огыл. «Большая Кокшага» заповедникын пашаҥже-влак дене вашлиймаш, Алёна Иванова «Традиционное природопользование», Сергей Маланов «Озёра Республики Марий Эл», Маргарита Маланова «Мусора больше нет!» теме-влакым ронченыт.

Слёт лектышым ончыктышыжо, очыни, проект паша. Чылажге лу проект шочын: «Кугезе корно, «Регион кокласе ЗАО «Дружба»», «Чоткарын мландыштыже», ««Йоча-влаклан марла лудына» регион кокласе акций», «Марий сӱанын шергылыкше», «Малая Родина – большие возможности», «Тропа двух культур», «Солык, савыц, шовыч», «Мусору нет!», «Марий шинча дене». Чыла проект-влак шкешотан да оҥай лийыныт.

Тӱвыра программат веселан чоҥалтын: марий кас, мурен ӱчашымаш, кидпаша мастар-класс-влак, экскурсий да молат. Эн кугу мероприятий – Х «Кугезе мланде» фестиваль, манын шонем. Тыште ӱдыр-рвезе-влак адак шке чолгалыкыштым ончыктышт: Марий калык погынлан 100 ий темме дене кылдалтше темылан изирак сценкым модыч, йӱр вошт марий сем почеш мурен куштышт. Килемар районышто IX самырыктукым слётын чолгалыкыштым кужун шарнаш тӱҥалыт.

Марий шӱлыш самырык-влакым иктыш ушен, шуко у шонымаш-влак, проект-влак шочыныт, марий улмо дене кугешныме шарлен. Пиал огыл мо тиде? Ӱшанен кодына, лишыл жапыште нине проектым илышыште ужына.

Автор: Вероника Мустаева.
#МариАрслан #марислет #marislet #мари #самырыктукым #марикалык#марислет2017
#марийкалык#марийслет2017#арды#9слет #Утукым_Молодоепоколение