«Я умею вязать» лÿман киносÿрет нерген

Илыш шÿртö мундыра семын пöрдеш. Южгунам тудо пÿтырналтеш, товаҥеш, а пышкемалтше кылдышым рудаш йöсö... Пÿрымашат айдемылан тÿрлö пöрдемым ямдыла, нуным сеҥен, тöр корныш лекташ кöргö вий кÿлеш. Йошкар-Оласе режиссёр Надежда Степанован «Я умею вязать» лÿман киносÿретше тидын нерген. Тÿҥ геройжо Таня шке илышыжым рончаш тöча. Киносÿретын премьер ончымашыже Йошкар-Оласе «Октябрь» кинотеатрыште эртен.

Надежда Степанова — режиссёр:
- Мый моткоч тургыжланенам, но тыгодымак куаненам, вет шке кином шочмо кундемын калыкшылан темлем. Тиде мыйын икымше кугу киносÿретем. Шкем шке пытарыме нерген шонымаш историй, самырык ÿдыр чон шыгырым сеҥен, шке илыш кылжым пидеш. Киносÿрет тыгак маналтеш - «Я умею вязать».

Надежда Степанован киносÿретше — илыш драме, шкем кöргö гыч ончалмаш. Сюжет илыш негызеш возалтын. Геройын прототипше — Татьяна Богатырева — киносÿретын сценаристше. Коло ияш Танялан моткочак неле: илыш гыч чыла волгыдылык, куан йомын. Чон йöсö дене тудо кугу сулыкыш пурынеже, но...уло кöргö вийым поген, чылажымат угыч шонен налеш да туткар гыч сайын лектеш. Тиде сÿрет 2010 ийыште Санкт-Петербургышто эрта.

Надежда Степанова — режиссёр:
- Тиде сценарий «Личное дело» конкурсышто сеҥен. Кунам мый тудым лудын лектым – умылышым: мый тиде ÿдырлан полшынем. Да кунам мыланем шке виемым киношто терган ончаш темленыт – вигак кöненам.

Самырык режиссёрын шонымашыже шукталтын. Ончышо-влак кином сай кумыл ден вашлийыныт.

Онычшо-влак фильм нерген тыге ойлат.

Владимир Актанаев:
- Тиде фильмым умылаш куштылгыжак огыл. Тудо шонкалаш тарата.

Максим Александров:
- Фильм сай, Европысо кÿкшытан. Шуко ончышылан келшен.

Раисия Сунгурова:
- Киносÿретын икымше ужашыжым ончымо годым вуйыштем шуко йодыш лектын ыле, но действий вияҥме семын нунылан вашмутым муынам.
Фильмым ончалаш чылалан темлем.

Каласен кодыман, Надян йыгыр акаже – Таня уло. Тудат киноиндустрий пашалан шуко жапым ойыра. Еш усталык шÿлышан. Ӱдыр-влакын Семен Николаевич Иванов чÿчÿшт «Ленфильм» студийыште операторлан ыштен, коло утла киносÿретым возен. Ончыкылык нерген Надежда тыге шонкала.

Надежда Степанова — режиссёр:
- Кинооператор Сеня чÿчÿн Марий кундем нерген кином ышташ шонымашыже лийын. Мый шонымашыжым илышыш пурташ тыршаш тÿҥалам.

Илыш мундырадам аклыза да шÿртыжö дене сай пÿрымашым пидса. Тек тудо самырык-влаклан волгыдо поро илыш корным ончыкта.

Автор: Ирина Павлова.
#МариАрслан #УВЕР_НОВОСТИ #Кино

• Кино увер
• Новости кино