Марий йылме да тÿвыра кеҥежымсе школ пашам иктешлен

Кок арня жапыште (2017 ий 3-14 июльышто) йот элласе студент-влак марий йылмын сылнылыкше да калыкнан тÿвыра поянлыкше дене палыме лийыныт. Нуно марий йылмым интенсив манме программе почеш тунемыныт, оҥай экскурсийыш миен коштыныт, шке шотан чолга еҥ-влак дене вашлийыныт. Тунемме жап писын эртен, пашам иктешлыме жапат толын шуын. Марий йылме кеҥежымсе школын студентше-влак йылме палымым ончыктышо сертификатым кидыш куанен налыныт, сай, поро, кумылым нöлтышö, умбакыжат марий йылмым шымлаш таратыше мут-влакым колыштыныт. Ынде чыла тидым уна-влак пеленышт шочмо кундемышкышт наҥгаят. Каласен кодыман, тений студент-влак мÿндыр Японий, Финляндий, Венгрий элла да Моско ола гыч лийыныт.

Японий гыч студент, марий йылме да тÿвыра дене кеҥежымсе школын тунемшыже Мураками Такенори тыге ойла: «Мыланем марий йылме моткоч келшен. Угыч толнем. Марий калык весела, поро калык. Туныктышо пеш сай лийын».

Йот элласе студент-влак Марий кугыжаныш университетын тÿшкагудыштыжо иленыт да марий студент-влакын илышышт дене палыме лийыныт. Нунын дене поснак пеҥгыде кылым Калыкле тӱвыра да тӱвыра кокласе вашкыл институтын студентше-влак кученыт.

Школ пашам иктешлыше йыргешке ÿстелыш Марий кугыжаныш университетын ректоржо Михаил Швецов, Калыкле тӱвыра да тӱвыра кокласе коммуникаций институтын вуйлатышыже Родион Чузаев толыныт. Нуно кенежымсе марий йылме школын студентше-влаклан шинчымаш сертификатым кучыктеныт да поро мутым каласеныт, умбакыжат шинчымашым погаш Марий кугыжаныш университетыш толаш ÿжыныт.

Марий йылме да тÿвыра кеҥежымсе школ калык кокласе кылым пеҥгыдемда, марий йылмын да тÿвыран поянлыкшым тÿня мучко шара.

Автор: Ирина Павлова.
Фото с сайта МарГУ.
#МариАрслан #мари #самырыктукым #марикалык #МарГУ #МарийЭл