«Пÿтырналтше шудым марлан пуэна»

Кугезе тукымна моткоч ушан да мудреч лийын. Теве кеҥежым пакчаште шÿкшудо чоным витарен гын, вигак сÿаным ыштеныт! Да-да, шÿкшыдым иктаж коремлакыш марлан пуэныт.

Тыгак ыштышт «Саскавий» ушемын чолга ÿдырамашыже-влак Ираида Степанован пакчаштыже.

Тиде пакчаште пÿтырналтше шудо моткочак шуко. Озавате тудым марлан пуаш лие. Коҥгаш олтыш, мелнам, когыльым кÿэште. Шкеак сылне мурылан шомакым возыш. Да йолташвате-влакым ÿжö. Нуно кинде шинчал, пура, тÿмыр да сылне сÿан муро дене оръеҥым пелчан шудылан коремлакыш ужатышт...

Пакча кумдык – ныл лукет,
Кажне лук гыч налына.
Келге вожан ужар шудет
Таче марла пуэна.

Пÿтырналше лай мардежет
Пакча мучко пуалеш.
Пÿтырналше ужар шудет
Таче марлан каялеш.

Пÿтырен моштышо шудыжо
Вожге пÿтырнен каялже.
Кужу пунеман ешыже
Почеш лектын каялже.

Калай ведырам кырена,
Сÿан мурым мурена.
Тиде пакчан пÿтырем шудыжым
Таче марлан пуэн…

Сай йÿла, вет? Туге шол!