Тукайын почеламутшо марла йоҥгалтын

Вход на сайт

2017 ий 26 апрельыште Татарстан Республик Шочмо йылме кечым пайремлен. Тудым йӱла почеш татар сылнымутын классикше Габдулла Тукайын шочмо кечыж дене кылдыме. Тиде ийын кумдан палыме поэтын шочмыжлан 131 ий темын.

Эрдене Татарстан Республикын президентше Рустам Нуралиевич Минниханов Озаҥ оласе Габдулла Тукай лӱмеш скверыште верланыше поэтын памятникше воктеке пеледышым пыштен. Шочмо йылмым пагалыше, сылнымутым йӧратыше-влак почеламут-влакым йоҥгалтареныт.

Муса Джалиль лӱмеш опер да балет татар академический кугыжаныш театрыште Татарстан Республикын президентше Тукай лӱмеш кугыжаныш сылнымут премийым кучыктен. Премийым налше кум лауреат коклаште – писатель Мадина Маликова. Тудын возымо роман, повесть да ойлымашыже-влак кумдан палыме улыт.

Кажне тыгай премий – 500 тӱжем теҥге. Кугу наградым налме годым Мадина Маликова тыгерак каласыш: «Икымше книгам 50 ий ондак ош тӱням ужын. Пӱтынь илышемым сылнымутлан пӧлекленам. Да тачысе премийым мыйым да творчествемым, тыгак чумыр татар сылнымутым кугун аклыме семын ужам. Татар писательын лӱмжӧ эре кӱшнӧ шогаш тӱҥалеш, шонем».

Тыгак Харис Салихов «Светские и духовные мотивы в творчестве А. Пушкина, Г.Тукая и проблемы нравственного воспитания сегодня» да «Религия и наука (основы мировых религиозных и светских культур)» книгаж-влаклан премий дене палемдалтын.

Розалина Шагеева «Розы вечности: сборник статей на татарском и русском языках» книгаже студент-влаклан, лудшо-шамычлан кӱлешан, кӱкшӧ акым налын.

Театральный уремыште верланыше Габдулла Тукайын памятникше ваштареш калык лыҥак погынен. Сылнымут митингым эртараш манын, кугу вийым Татарстан Республикысе писатель ушем пыштен. Нуно тӱрлӧ кундемла гыч писатель ушем вуйлатыше-влакым, тыгак Габдулла Тукайын почеламутшым шочмо йылмылашкышт кусарыше поэт-влакым, ятыр унам ӱжыныт. Лӱмлӧ писатель-влак погынышо-влакым саламленыт, сылнымутым каласкаленыт. Марий Эл Республик гыч Россий писатель ушемын региональный пӧлкам вуйлатыше Светлана Архипова калык ончыко лектын, калыкым Шочмо йылме кече дене саламлен, Габдулла Тукайын «Шочмо йылме» почеламутшым марла лудын пуэн. Пайремыште тыгак журналист да краевед, Марий Эл Республик тӱвыран сулло пашаеҥже, историй наука кандидат, доцент Руслан Бушков лийын. Тудат поэт нерген поро мутым ойлен.

Автор: Светлана Григорьева.
Фотолаште: Габдулла Тукайын памятникше воктене марий саламлымаш йоҥга; пайрем годым; (шола гыч пурлашке) палыме композитор Жаудат Гильманов, мер деятель Раис Тухватуллин, Светлана Архипова, Руслан Бушков; тӱрлӧреспублик гыч толшо писатель ушемым вуйлатыше-влак коклаште.
#МариАрслан #поэзия #культура #искусство #творчестве #МарийЭл

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.