«Саскавий» идалыкым иктешлыш

Сылне пайрем кечын, 2017 ий 14 февральыште, «Саскавий» марий ÿдырамаш ушем иктешлыше конференцийым эртарыш. Чолга, чулым, мастар, мотор деч мотор да пашаче-влак мер ушемын 2016 ийысе пашажым иктешлышт да 2017 ийлан паша радамым пеҥгыдемдышт.

«Тÿняште мари ÿдырамаш деч моторжо нигöат уке» манын, Геннадий Григорьев чылаштымат Йöратыше-влакын кечышт дене саламлыш да Ольга Якимова, Геннадий Куклин, Александр Мамаев («У муро» студий) дене пырля «Эн лишыл айдеме» сылне мурым йоҥгалтарышт. Тыгак тиде саламлымашке самырык мурызо Аделина Батаева ушныш, мурпöлекым ыштыш.

«Саскавий» марий ÿдырамаш ушемын 2016 ийысе пашажым вуйлатыше Людмила Кошкина иктешлыш. Тыгодым «Саскавий» шке ончылныжо шында:
1) Шочмо йылмым аралыме да вияҥдыме пашам ворандарен шогаш.
2) Ӱдырамашын, самырык-влакын тазалыкыштым аралыме шотышто пашам вияҥден колташ.
3) Марий Элысе ÿдырамаш-влакын ушемышт дене кылым пеҥгыдемдаш, тыгак Шупашкар да Суоми ӱдырамаш ушем-влак дене кылым ышташ.
4) Калыкнан тӱвыраже, йӱлаже дене палдарыме да чыла тиде поянлыкым аралыме шотышто самырык-влак дене пашам уэмдаш.

А тÿрыс сомылым икмыняр тÿшкалан шелаш лиеш: тиде – оргйодышым рашемдымаш, тÿшка мероприятий-влакым кугурак да самырык-влакланат эртарымаш, яллашке лектын коштмаш, моло ушем ден тöнеж-влакын пашашкышт ушнымаш да чолга ÿдырамаш-влакым юбилейышт дене саламлымаш.

Ӱмаште «Саскавий» ушем Кужэҥер, Морко ден Советский районлаш миен кошто. Кужэҥер Токтабелякыште «Коҥга пазар» пайремыште лие. Морко велныже «Чÿкшö курык» акцийыш ушныш, а Советский Ургакшыште «Гармоний» клуб дене вашлийын мутланыш. Теният кок ройыныш миен шуо: Параньга Эльпанурышто «Унавий» клуб дене чон почын мутланыш, Кужэҥер Йывансолаште черетан «Коҥга пазар» пайремыш ушныш.

Тазалыкланат кугу тÿткышым ойырымо. самырык-влак дене «Таза капыште – таза чон» мутланымаш лие, вара тыгаяк лÿман спорт таҥасымаш тале ÿдырамаш-влакым иктеш чумырыш.

Пеледыш пайрем годым «Марий солык» конкурсым эртарыме. Тиде конкурс пайремыш савырныш, шыжым театрыште лие. Шуко район гыч уна-влак толыч.

«Изи мöр пеледыш», «Ӱдырсий», «Марий ёлко», «У тукым», «Эко-культур» форум», «Пеледше тукым». Нине мероприятий йоча да самырык-влаклан пöлеклалтыч. Нуным илышыш шыҥдараш манын, «Саскавий» ушемын еҥже-влак шийвундымат поген ойырышт.

Конференций годым тергыше комиссийын пашажым Зинаида Александрова иктешлыш. У план дене Маргарита Тойшева палдарыш. Лишыл жапыште «Саскавий» ушем марий ÿдырамаш-влакым кандашымше мартым пайремлаш чумыра. Тиде пагыштак вуйлатыше Людмила Кошкина ден вуйверын еҥже Анфиса Эманова Финляндийышке кудалыт, финн-угор ÿдырамаш-влак дене вашлийын, кылым ышташ.

Конференцийыштак «Марла ойлаш тунемына» видео-урок дене палдарышт. Тÿрлызö, амалкалче Ираида Степанова «Илыш вий» аудиокнига презентацийым ыштыш.

«Саскавий» марий ÿдырамаш ушем умбакыжат йылмынам, тÿвыранам, йÿланам аралаш, тукым гыч тукымыш шуяш тÿҥалеш. Палемдыман, 2017 ий декабрьыште ушемлан 10 ий темеш.

Автор: Елизавета Петухова, «Арслан» этнокультур интернет-журналынпрактиканткыже.
#МариАрслан #Саскавий #мари #марикалык #мариӱдырамаш #СоюзЖенщинМари