Самырык автор-влаклан премийым кучыктеныт

26 декабрьыште кумдан палыме сылнымутмастар, журналист, публицист, поэт, прозаик, драматург Вячеслав Александрович Абукаев-Эмгакын шочмо кечыже. Ила ыле гын, 2016 ийыште тудо 58 ийым тема ыле.

Документ почеш 5 январь 1959 ийыште шочын манын возымо, но Вячеслав Абукаев илымыж годым пайремжым эреак 26 декабрьыште палемден. Вячеслав Александрович ятыр ий М.Шкетан лӱмеш Марий кугыжаныш драме театрыште сылнымут пӧлкам вуйлатен, пытартыш паша верже тыште лийын. Сандене ме тудым эреак порын шарнена.

Весат куандара: кажне ийын республикыштына самырык автор, журналист, блогер-влаклан «Ший памаш» конкурс эртаралтеш. Тиде пашам Вячеслав Абукаев-Эмгак лӱмеш поро кумылым ончыктышо «Ший памаш» фонд шуктен шога, вуйлатышыже – Василий Краснов.

Йӱдвел мландыште илыше, нимучашдыме поро кумылан, сылнымутым йӧратыше, икмыняр книган авторжо Василий Краснов кажне ийын декабрь мучаште шочмо кундемышкыже Йӱштӧ Кугыза семынак толеш да конкурсышто сеҥыше самырык талантан еҥ-влаклан премийым кучыкта. Черетан куанле вашлиймаш 24 декабрьыште Усталык ушем-влакын пӧртыштышт эртыш.

Тений «Кинде-шинчал» (поэзий) премий дене Вера Гордеева ден Алёна Яковлева, «Виш чон» (журналистика) премий дене Татьяна Айтова ден Лидия Шабдарова, «Канде тул» (теле-радио журналистика, блогер) премий дене Татьяна Соловьёва ден Николай Любимов палемдалтыч.

Куанен каласена, сеҥыше-влак коклаште икмынярынже Шкетан театр пелен чумырымо Усталык лабораторийын еҥже улыт. Ме нуным шокшын саламлена да шочмо йылме, сылнымут полшымо дене чон арулыкым арален коден, йылме усталыкым вияҥдаш тыланен кодына!

Автор: Татьяна Светлакова.
#МариАрслан #сылнымут #мари #марикалык
#культура #искусство #ЙошкарОла #МарийЭл #Россия