Марий сылнымутын лаштыкше Ханты-Мансийскыште… (видео)

Вход на сайт

2016 ий 24 октябрьыште йÿдвел кундемыште, Ханты-Мансийск олаште, марий литературын кечыжым палемденыт. Кече ий еда эртыше «Югра многоликая» проектын кышкарыштыже эртен. Проектын озаже поэт Любовь Геннадьевна Лыткина, «Юграсе интеллектуал да творческий вий ассоциаций» ушемын тÿҥ еҥже. Тений, марий сылнымутлан пöлеклалтше мероприятийым эртарымаште координатор семын полышкалыше марий ÿдырамаш, филологий шанче кандидат, Югорский кугыжаныш университетысе гуманитарий институтын йот йылме кафедрын доцентше Марианна Юрьевна Андуганова лийын. Тудо округысо марий-влак дене ваш кылым муын, проектыш ушнаш кумылаҥден.

Тыге ХМАО-Юграште илыше марий-влак иктыш погыненыт: Нижневартовск, Нягань, Сургут, Федоровский, Салым, Советский (Югорск). Йошкар-Ола гыч, пайремлан лÿмынак, Марий кугыжаныш универститетын ныл студентышт толыныт (Христина Иванова, Анна Смирнова, Анжелика Крылова, Дмитрий Пайбулатов). Нуно марий классике мутмастар-влакын почеламутышым калыклан руш да оригинал йылме дене йоҥгалатреныт, эсогыл кушталтенытат.

Пайремыште поснак ХМАО-Юграште илыше тачысе кечын серен шогышо марий-влакым ойыреныт. Тиде – самырык поэтессе, кусарыше Раисия Сунгурова (Сургут), руш, марий йылмыла дене серызе прозаик Роза Салах ден автор-исполнитель Николай Изергин (Нижневартовск).

Вес калыкын сылнымутшат öрдыжеш кодын огытыл. Пайремым сылнештарыше уна-влак (Мария Вагатова – хант поэт, Светлана Динисламова – мансий мутмастар, Любовь Миляева – руш серызе) шочмо йылме дене возымо почеламутыштым лудыныт. Ты произведений-влак, марлат йоҥгеныт, нуным Раисия Сунгурова лÿмынак кусарен, йоҥгалтарен.

Тÿрлö вер гыч толшо марий ушем да коллектив-влак, шке пошкудыштым, родыштым да тыглай ончаш толшо калыкым чапле концерт выступлений дене куандареныт. Нижневартовск гыч «Мари» ансамбль да Югорскын Советский посёлок гыч «Ӱжара» ушемын талыеҥышт марий куштымашын вийжым шке чолгалыкышт гоч луктын моштеныт. Олык марий, курык марий, пошкырт марий сем дене тавен, калыкын кумылыштым савыреныт. А ола шотан Федоровский посёлок гыч «Сибирь марий» ансамбль тошто марийын куштымашым ончыктеныт. Чиемыштат келшен толшо, йыдал дене таваш лекше марий вате-влак чыланыштланат сайын шарналт кодыныт. Тыгак Федороский гыч мотор марий вургемым чийыше пеледыш гак икшыве-влак кужу корным эртен толыныт. Нунын посна койышан лывыргын куштымышт залысе чыла калыкым куанен шыргыжалаш таратен. Мероприятийлан посна ÿшаным шыҥдарыше тÿсым пуртен.

Сылнымут пайрем сымыктыш дене чак кылдалтше лийын. Сÿретче Юрий Таныгинын мини электрон выставкыже эртыш манаш лиеш. Тыгак чий йÿлам нумалше калыкын чием шотыштат ойыртемалтше, рашынрак палемдыде ыш код, тидланат посна жапым ойырышт.

Округын тÿҥ олаштыже эртыше Марий литератур лаштыкым перзентоватлыше мероприятий, ваш келшымашнам кылдыше, ший кандырам пунен куштымаш да кÿкшö закон почеш эртыше чес фуршет ден мучашлалтын. Икманаш, кече пеш эплын, марий тÿвыра да сылнымут шулышан эртен. Ончаш толшо верысе уна-влакын ойлымышт почеш, «марий калык посна сынан, волгыдо, ару кöргö шижмашан улыт, шке национальный ойыртемыштым тачат арален ончыко нагаят». Тыгай аклыме ой йÿдвелыште илыште марий-влак нерген умбакыжат йоҥгаш тÿҥалеш манын ÿшаныме шуэш.

Автор: Раисия Сунгурова, поэтессе, мероприятийын учатникше.
Фото сайт гыч: https://vk.com/mary_yshem.
Хэштег: #МариАрслан #Сургут #мари

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.