Коми, одо да мордва самырык возышо-влак дене пырля лийынна

2016 ий 21-23 сентябрьыште Ижевск олаште Финн-угор самырыктукым этнокультур-влакым чумырышо «Палэзян» фестивальыште лияш логале. Мыйым тиде мероприятийышке самырык возкалыше семын ӱжыныт. Тыгак тушко «Куат» ансамбль (солисткыже – Марина Садова) миен.

Палемдыман, фестиваль тений икымше гана поэт-влакым чумырен. Коми, одо да мордва самырык возышо-влак дене пырля лийынна. Мероприятийын программыже пеш поян ыле. Поэт, прозаик, газет да журнал пашаеҥ-влак, удмурт студент да туныктышо-влак дене вашлийын мутланенна. Кажныже шке проблемыжым, возымаште могай ситыдымаш дене вашлиймыжым каҥашен. Подстрочно кусарыме почеламутлам лудынна, шке дене палдаренна да верлаште сылнымут вияҥдымаште могай паша ышталтеш, кутыренна.

Тыге марий кундемыште самырык возышо-влакым утыжым огыт поддержатле гынат, моло кундем дене таҥастарымаште, могай-гынат сомылжо мемнан дене ышталтеш улмаш. Конкурс-влак эртаралтмаш, альманах да сборник-влакым лукмо нерген ойлымек, родо-тукым калыкын тидыжат ок ышталт манын, умылышым. Марий-влак нерген кугешнен ойлымо шомакымат колаш логале, сай.

Одо кундемыште лекше «Удмурт дунне» газет редакций пелен самырык возышо-влаклан семинарым эртарат. Тений икымше гана «Ингож» альманахым луктыныт, ме лач тиде книган презентацийышкыже логална. Тушто мемнанат «Эрвий» альманах лекме нерген палдарышым да Марий Элысе писатель ушемын самырык-влак дене пашам шуктымыжым ойлен кодышым.

Газет редактор Зинаида Рябинина финн-угор возышо-влакым моткоч шокшын вашлие, мыйын почеламутем шке йылмышкыже кусарен ямдылен ыле, лудна, каҥашышна. Ситыдымашымат, поро шомакымат ойлыш. Почеламутем-влакым шушаш жапыште газетеш печатлаш сӧрыш.

Иктешлен каласаш гын, тыгай шотан мероприятийыш коштмаш могай-гынат саскам пуа. У вашлиймаш, у еҥ-влак дене палыме лиймаш, нунын опытыштым ончен, шке возкалымет уэш-пачаш радамлаш да иктешлаш кумылым луктеш. Тыгай уроклан тау!

Автор: Вера Гордеева. Материалым «Арслан» журналлан лÿмын возымо.
Хэштег: #МариАрслан #культура #МарийЭл #молодёжь #этнокультура
#активнаямолодёжь #финно_угор #мари #самырыктукым #марикалык