Крымыште самырык возгалыше-влак чумыргеныт

Вход на сайт

Кеҥеж мучко Крымыште «Таврида» лӱман Россий кӱкшытан самырык-влакын форумышт эрта. Тудо Шем теҥыз воктенсе «Волна» каныме базыште верланен.

Тавридын организаторжо-влак: ФАДМ (федеральное агентство по делам молодёжи), РФ Общественный палате да «Роспатриотцентр».

Тыге 2016 ий 1 июль гыч 24 август марте 3000 уста самырык ӱдыр-рвезе тӱрлӧ лекций, семинар да мастар-класслаште шинчымашым пога. Эн тӱҥ мероприятийлан «Конвейер проектов» шотлалтеш. Тыште «Тавридын» участникше-влак шке проектыштым аралат.

Теве 2 августышто «Самырык писатель, поэт да критик-влак» смене лие. Тушко 500 утла самырык возкалыше-влак погынен ыле. Нунын коклаште Марий Эл Республик гыч Ольга Чайникова да Татьяна Япаева ушненыт.

Форумысо программе почеш, шуко пайдале вашлиймаш сынан лекций-влак эртышт. Мутлан, форумын участникше-влакым саламлаш Россий Федераций президентын полышкалышыже Андрей Фурсенко толын.

Тыгак кумдан палыме эксперт-влак лийыныт: РФ президентын советникше, Лев Толстойын кугезе уныкаже Владимир Толстой, «Литературная газета» редакцийын вуйлатышыже Юрий Поляков, Россий писатель да «Свободная пресса» сайтын тӱҥ редакторжо Сергей Шаргунов да молат. Умбакыже Таврида форумын участникше-влакым икмыняр тӱшкалан пӧлышт. Тыге нуно шке мастарлыкыштым утларак вияҥдаш тӱҥалыч да эксперт-влак деч шуко пайдале каҥашым налыч.

Автор: Татьяна Япаева.
Хэштег: #Росмолодёжь #ФорумТаврида #Роспатриот #ОПРФ
#мариарслан #молодёжь #самырыктукым #активнаямолодёжь

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.