Марий калыкын X Погынжо почылто

Вход на сайт

2016 ий 15 апрельыште Марий калыкын X Погынжо почылто. М. Шкетан лӱмеш марий кугыжаныш драме театрыш Российын тӱрлӧ регионжо, эсогыл Крым гычат, Эстоний, Украине гыч 500 наре еҥ чумырген. Тушеч 283 еҥже делегат лийын.

Кечывал деч ончыч пленар заседаний эртен. Тудым Марий Оньыжа Анатолий Иванов вӱден. Эн ончычак Погыныш пурышо саламлымаш-влак дене палдарен. Тыге марий калыклан посна тыланышым Пошкырт кундемын главаже Рустэм Хамитов, Свердловск кундемын губернаторжо Евгений Куйвашев, РФ финн-угор калык-влакын ассоциацийыштым вуйлатыше Пётр Тултаев да молат колтеныт.

Чумыргышо-влакым РФ Кугыжаныш Думын депутатше, 2008-2012 ийлаше Мер Каҥашым вуйлатыше Лариса Яковлева саламлыш. Тудо Кугыжаныш Думын председательже Сергей Нарышкинын, Кугыжаныш Думыштак калык-влакын пашашт шотышто комитетым вуйлатыше Гаджимет Сафаралиевын тыланымашышт дене палдарыш.

Марий Элысе Кугыжаныш Погынын председательже Юрий Минаков поро ойым каласыш да Кугыжаныш Погынын Чап Кагазшым Анатолий Ивановлан да «Чолман» газетын коллектившылан кучыктыш.

Тыгак уна-влак шке мутыштым ойлышт. Мутлан, Чуваш Республикысе тӱвыра, калык да архив паша шотышто министрын пашажым шуктышо Константин Яковлев, Пошкырт кундемым вуйлатышын Администрацийыштыже тыршыше Вадим Антонов.

Марий Оньыжа Мер Каҥашын ныл ияш пашаж нерген кумда докладым ыштыш. Тудо йылмым, йӱлам аралыме шотышто йодыш-влакым нӧлтале. Анатолийй Николаевич каласыш: «Ме, марий-влак, Россий кугыжанышын чыла шотыштат тӧр праван гражданинже улына. Тыгодым Ачамландылан пӱрышӧ чыла шере-кочыжымат пырля лош пайлена да элыштына илыше чыла калык дене ваш келшен илена. Лач тидыжак мемнан элнам куатлым да сеҥаш лийдымым ышта».

Ревизионный комиссийым вуйлатыше Александр Гайсинат пашам иктешлыш.

Кечывал лишан Марий калык погыныш Марий Эл Республикын главаже Леонид Маркелов тольо. Тудо пӱтын марий калыкым историеш возалтше пагыт дене саламлыш. Тыгак Марий Эл Республикысе тӱвыран сулло пашаеҥже лӱмым Эдуард Александровлан (Марий Эл) да Олег Третьяковлан (Татарстан кундем) кучыктыш.

Погын умбакыже шуйна.

Автор: Светлана Ёлкина ден Эльвира Куклина.

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.