Самырык возгалыше-влак Марий Элын уста поэтше дене вашлийыч

Вход на сайт

2016 ий 13 апрельыште «Поэзий шепкашке» сылнымут ушем черетан вашлиймашым эртарыш. Тушто эн вучымо уна - Марий Элын уста поэтше Альберт Васильев лие..

Эн ончыч Альберт Васильев илышыж, йоча да тунемме пагыт нерген каласкалыш. Кузе сылнымут корныш шогалын, кӧ тиде пашалан кумылаҥден, ойлыш. Тудо шона: «Чылажат школ гыч тӱҥалеш, туныктышо йоча-влакым литератур дек кумылаҥден мошта гын, тунам сай лектышыш шуын кертына»

Альберт Васильев тӱрлӧ темылан почеламут-влакым воза. Пытартыш жапыште шочшо почеламутшо-влакым лудын пуыш.

Палемден кодаш кӱлеш, поэт кусарыме пашаштат тырша, финно-угор йылмыла гыч почеламут-влакым кусара. Ты паша нергенат самырык возгалыше-влаклан каласкалыш, да финн-угор калык-влакын поэзийыштын икгайлыкышт да ойыртем нерген палемдыш.

Самырык возгалыше-влаклан Альберт Васильев шуко ой-каҥашым пуыш да умбакыжат возымо мастарлыкым вияҥдаш тыланен кодыш. Уста поэт тыге каласыш: «Почеламутышто тӱҥ – кок тӱҥалтыш корным возен мошташ, умбакыже рифме шке толеш».

Альберт Васильев дене пырля поэтессе Надежда Моисеева (Альберт Степановичын ӱдыржӧ) мутланымашке ушныш.

Тыгай вашлиймаш пеш пайдале лие, самырык возгалыше-влак шуко уым пален нальыч. Ӱшанен кодына, самырык-влакат лудшо еҥ-влакым у почеламутлашт дене куандараш тӱҥалыт.

Автор: Анна Васильева.

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.