Марий поэзийыште – у мурсаска

Вход на сайт

Марий кугыжаныш университетын выпускницыже, «Поэзий шепкаште» сылнымут ушемын ик эн чолга авторжо, самырык поэтесса Надежда Васильева, кызыт Моисеева (Надежда Эмыкан), лудшо-влаклан эше ик у почеламут книгам аклаш лукто. Тылеч ончыч «Ида шылтале мыйым», «Кастене мый лыве лиям» (Эстонийыште ныл йылме дене лекше) почеламут аршашлажым йӧратен лудна.

Шошо пагытыште шочшо ӱдырын «Мый шошын ӱдыржӧ улам» у книгаже 30 ияш изирак лӱмгечыж вашеш лектын. Почеламут-влак руш да марий йылмыла дене возалтыныт. Редакторжо – Марий Элысе тӱвыран сулло пашаеҥже, поэтесса Зоя Дудина. Руш йылмыш Виталий Грахов кусарен, тудак тӱрыснек книгам сӧрастарен. Автор шке сылнымут кумылжым кум ужаш дене почеш. Икымше – «Мый лиям мардежын таҥже». Тыште пӱртӱс ден вашкылжым чак шижына, ава, ял нерген келгын шонкалымыжым раш ужына. Йӧратымаш нерген «Шарналте мыйым» ужаш каласкала. Шке шижмашыжым кунамже шылтен, кунамже чон почын, лӱдде, ончыкта. Авторын философий сынан почеламутшо-влак пеш кӱкшӧ верым налын шогат. Тидым «Коклан шортам мый уло йӱкын воштыл» кумшо ужашыште умылена.

Книга лекме амал дене Надежда лудшо-влаклан пеш сай пайремым ыштыш. Шочмо Роҥго кундемыштыже 24 мартыште «Мый шошын ӱдыржӧ улам» книгаж гаяк лӱман творческий касым эртарыш. Роҥго тӱвыра пӧртыштӧ шыҥ-шыҥ погынышо калыкым онченат, авторлан акым пуаш лиеш шонем. Марий поэзийыште шке йӱкшӧ дене ойыртемалтше, самырык поэтесса Надежда Васильева, эше сылнынрак муралтыш. Надежда, марий национальный литературым вияҥдымашке надырым пыштымылан, Марий Эл Республикысе тӱвыра, печать да калык-влакын пашашт шотышто министр Михаил Васютинын таумутшо дене палемдалте. Ме, поэзий йолташыже-влак, тудын дене моткоч кугешнена да у кӱкшытыш шуаш тыланена.

Пайрем касын кумылжым вӱдышӧ, Кугыжаныш премийын лауреатше Володя Матвеев пеш чаткан рончыш. Надеждам саламлаш туныктышыжо Людмила Владимировна Александрова, «Район илыш» верысе газетын корреспондентше Галина Александровна Саверова, Роҥго клубын ондаксе вуйлатышыже Алексей Викторович Волков, школ директор Надежда Михайловна Шабалина толыныт ыле. Почеламут-влакымат йоҥгалтарышт, авторын мутшылан возымо муро-влакым Олык Ипай лӱмеш премийын лауреатше Надежда Пашкина, марий бард Геннадий Григорьев, Алёна Яковлева, Надежда Андреева йоҥгалтарышт. Марий Элын сулло артисткыже Татьяна Денисовам, тудат Эмыкан тукым гыч лекше, калык пеш шокшын вашлие. Надеждан пеленже чонжылан эн лишыл еҥже-влак, аваже Маргарита Фёдоровна ден ачаже, поэт Альберт Александрович Васильевмыт лийыч.

Кок йочан ава, амалкалче (селаштыже шке кевытшым куча) чыла вереат эреак чулым, а кызыт эше Ронгысо тӱвыра пӧртыштӧ пашам ышта. Пайремыште ансамбльыш коштшо изи участникше-влак пеш куандарышт. Верысе книгагудын пашаеҥже Любовь Александровна Калинина фойеште Надян творчествыж дене кылдалтше кугу выставкым ямдылен ыле.

Шошо кумылан Надежда Васильеван творческий касше шуко жаплан шарнымашеш кодеш. Тудо шошо гаяк вучымо, нерешталтше куэпарча гаяк чоным куандарыше да шошын икымше кечыйолжо гаяк шокшо лие.

Автор: Татьяна Светлакова, «Поэзий шепкаште» сылнымут ушемым вуйлатыше,
Олык Ипай лӱмеш премийын лауреатше.

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.