Марий калык X Погынышко делегат-влакым сайла

Вход на сайт

Chotkar_1+.jpgМарий калык X Погынжылан ямдылалтеш. Кажне кечын гаяк Марий Элын районлаштыже да вес кундемлаштат марий-влак погынымашым эртарат. Тушто делегат-влакым сайлат. Теве 2016 ий 5 февральыште Провой ден Юлсер районлаште конференций сынан мероприятий-влак эртышт.

Провой велыш (Звенигово олаш) Йошкар-Ола гыч Марий Оньыжа Анатолий Иванов мийыш. Погынымашке 65 делегат гыч 63-шо погынышт. Нуно Мер Каҥашыш темлышаш еҥлан районысо тӱвыра пöлкам вуйлатыше Лидия Аркадьевна Михайловам палемдышт. Кызыт Звенигово район гыч Мер Каҥашыш Нина Николаевна Зорина пура. Тудо кандаш ий почела тырша. Чолгалыкшым аклен, пашажлан тауштен, Марий Оньыжа «Марий Эл» энциклопедийым кучыктыш.

Юлсер кундемын погынымаштыже (Пöтъялыште) икымше оналмаш Валерий Мочаев ден Мер Каҥашын еҥже, Марий калык конгрессым вуйлатыше Эдуард Александров лийыч. Пашашке 45 делегат да эше шке кумылын 40 наре еҥ ушнышт. Мандатан еҥ-влак Погыныш 10 делегатым, кок эскерышым сайлышт да ик унам – район администраций главам – палемдышт. Мер Каҥашыш Карай школын директоржым Любовь Анатольевна Сергеевам темлат. Кызыт ты толкыныш Волжский район деч Галина Сергеевна Эшкинина пура.

Паледыман, таче кечылан погынымаш-влак Килемар, Кужэҥер, Курыкмарий, Морко, Шернур, У Торъял районлаште эртеныт. Тыгак Одо, Татарстан, Киров, Пошкырт (ныл район), Моско кундемлаште сайлымаш лийын.

Марий калыкын X Погынжо Йошкар-Олаште 2016 ий 14-16 апрельыште чумырга. Тушко элнан тӱрлö верже гыч 400 утла марий еҥ, уна-влак ушнышаш улыт. Тыгай Погын ныл ийлан ик гана лиеш.

Автор: Эльвира Куклина.

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.