Сылнымут да усталык паша дене кылдалтше сомыл верч

Кундемыштына ятыр самырык ӱдыр-рвезе шке илышыжым сылнымут корно дене, тыгак усталык паша дене кылден. Нунын сомылышт моткоч кӱлешан. Но шӱм дене ойырен налме сомыл южгунамже нимогай парышым огеш кондо, лачак чон кумылым шукта да калыклан кугу пайдам ыштымаште палдырна.

IMG_2375+.jpg

Кум ий ондак кумдан палыме писатель Вячеслав Абукаев-Эмгак лӱмеш «Ший памаш» сылнымут фонд ышталтын. Тудлан шуко вийым Североморскышто илыше да пашам ыштыше кокымшо ранган капитан, Россий писатель ушем член, прозаик да драматург Василий Владимирович Краснов пуа.

«Ший памаш» сылнымут фондын конкурсыштыжо 35 ияш марте самырык автор-влак участвоватлен кертыт. Тиде ийынат ятыр талантан самырык еҥ шке мастарлыкшым терген. 2015 ий 26 декабрьыште, Вячеслав Абукаев-Эмгакын шочмо кечынже, тиде конкурсышто сеҥыше-влакым палемдыме. Пайрем Марий кугыжаныш университет пелен эртен, вара «Эврика» унагудын кафештыже шуйнен.

«Поэзий» номинацийыште сеҥышыш самырык поэт-влак Надежда Васильева ден Ирина Курочкина лектыныт. «Прозо» номинацийыште республикыштына йоча-влаклан йомакым устан возкалыше, прозаик Светлана Бессонова да новелле-влакым серыше Надежда Годунова ойыртемалтыныт. «Эн сай журналист паша» номинацийыште «Ший памаш» фондын дипломжо да окса премий дене «Марий Эл» газетыште тыршыше Алевтина Байкова ден журналист Денис Очеев палемдалтыныт. «Телевидений да радио» номинацийыште Алёна Иванова ден Татьяна Егошина лийыныт. Каласен кодыман, тений уста участник-влак лиймылан кöра, жюри чыла окса премийымат кок еҥлан шелаш кутырен келшен. Тидыже мемнан республикыштына сылнымут памаш да усталык шӱлыш тӱвырген толмо нерген ойла.

IMG_2379+.jpg