Марий Элын поэтше Геннадий Ояр (Сабанцев) дене вашлиймаш

Вход на сайт

2015 ий 5 ноябрьыште Марий Кугыжаныш университетысе книгагудын краеведений пöлкаштыже Марий Элын поэтше Геннадий Ояр (Сабанцев) дене вашлиймаш эртыш.

Вашлиймашын тÿҥ шонымашыже – самырык-влакым кызытсе поэзий дене палдараш, тудын деке шÿмаҥдаш. Садланак уна-влак дене мутланаш студент-влакым чумырымо. Тыгак «Ончыко» журналыште тыршыше да «Поэзий шепкаште» сылнымут ушемын еҥже Игорь Попов, мурызо Алёна Яковлева, университет пашаеҥ-влак Галина Тимофеева ден Виталий Михайлов толыч. Мутат уке, «Поэзий шепкаште» еш да сылнымут ушемым вуйлатыше Татьяна Соловьёва лийыч.

Вашлиймашым Геннадий Оярын творчествыжым эскерен шогышо Виталий Михайлов тÿҥале. Тудо поэт нерген шуко оҥайым каласкалыш, сборникше-влак дене палдарыш.

Геннадий Леонидович шкежат ойлыш. Тудо шочмо ялже - Кужэҥер район Ермарий - нерген шарналтыш. Юнкор пагыт гыч оҥайым, студент илышым палемдыде ыш лий. Шкеже Марий кугыжаныш университетысе историй-филологий факультетын марий йылме да литератур туныктышо пöлкажым тунем пытарен. Кузе пален нална, школыш каяш нигунамат шонен огыл, лач журналист лияш шонен - тыгак лийын. Кызыт Геннадий Ояр «Марий Эл» ГТРК радиошто журналистлан тырша.

Автор: Вероника Мустаева, «Арслан» журналын корреспондентше.

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.