Волонтёр лияш куштылго мо?

Вход на сайт

Вÿд спорт дене тÿнямбал 16-шо чемпионат шижде эртен кайыш. Тудо 2015 ий 24 июль гыч 9 август марте Озаҥ олаште лие. Тушто ме, кок тӱжем наре волонтёр (Марий Эл гыч 25 еҥ), кум арня илышна, пашам ыштышна.

Да, тиде жапыште шуко уым пален нална, тӱрлö вере вийым тергышна. Тӱҥалтыште нелырак ыле гын, пытартыш кечылаште пашана икшырымын кайыш, кеч-могай йодышланат вашмутым куштылгын мумо, еҥ-влакымат палыме. Тыгодым йот йылмын кӱлешлыкше чот шижалте.

1439749736_2.jpg

Волонтёр пашаште лӱдын шогыман огыл. Кöлан мо кӱлеш - эре полшыман. Мый, мутлан, кушто гына шкемым шым терге.

Олаште коштмо годымат иктаж-могай йот кундем гыч толшо айдеме полышым йодын кертеш. Тыге, итальянец-влак дене палыме лийна. Нуно сай рестораным кычалыт ыле. Икманаш, ужатыме годым ятыр мутланышна да пален нална: итальянец-влак Грегорио Палтриньери лӱман спортсменын лишыл родыжо улыт. Грегорио чемпионатыште кок медальым сеҥен нале: 1500 метран дистанцийыште икымше верым да 800 метраныште – кокымшым.

Вес кечынат нине итальянец дене вашлияш пӱрыш. Тыгай вашлиймашлан моткоч куаненам. Молан манаш гын, нуно шке мыйым тора гычак палышт да воктекем саламлаташ тольыч. Йот еҥ-влакын поро кумылышт куандарыш.

7 августышто пытартыш гана соревнованийым эртараш полшышна. Мемнан объектыште таҥасымаш турнир «Мастерс» дене пытыш. Тиде кечын индеш заплыв лие, спортсмен-влак кум меҥгым ийыч. Мый стартовый линийыштак шогышым, ийше-влаклан куш шогалаш кӱлмым умылтарышым.

6 август гычак Марий Эл делегаций вес объектыш кусныш. Ныл кече мемнам Татнефть ареныште чемпионатым петырыме церемонийлан ямдылышт.

Сценышке флагым нумал луктына манын пытартыш марте ӱшанен омыл. Туштак кумдан палыме еҥ-влак Полина Гагаринам, Сергей Лазаревым, «Каста» группым ужаш йöн лие. Нуно мемнан семын «закрытийыште» выступатлаш ямдылалтыч.

Репетицийыште ятыр нелылыкым чыташ логале: 160 утла волонтёр, неле да кужу флаг… Сценыште шагал репетироватлыме. Полина Гагаринан мурыж почеш флагым рӱзен моштыман да эше чылан икгай ыштыман, ты жапыштак вӱдыштö кошташ да пычкемышыште сцене гыч шыман каяш тунемман. Кузе гына мемнам организатор-влак ышт толаштаре. Туге гынат, сценыш лекме дене чыла йöсылык мондалте. А кунам тыйым уло тӱнялан телевизор дене ончыктат… Куанен от тем!

Теве тыгай волонтёрын пашаже. Куштылгыжак огыл, но весела, айдемылан шуаралташ полша.

А Вÿд спорт дене тÿнямбал 16-шо чемпионатыште 190 эл гыч кок тӱжем утла спортсмен вийжым тергыш. 1800 официальный уна лие. Россий кумшо верыш лекте. Икымше – Китай, кокымшо – США.

Автор: Татьяна Япаева, волонтёр, туныктышо.

09CslO85QzE.jpg

QC7lRSnX2YA.jpg

wtngIPVSPlY_0.jpg

92EkYH0MpoY.jpg

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.