Пошкырт кундем Тымбай ялыште у парклан негызым пыштыме

Вход на сайт

2015 ий 9 майыште Пошкырт кундем Мишкан районысо Тымбай ялыште у парклан негызым пыштеныт.

Сеҥымашлан 70 ий темме кечын Тымбай ялын ожнысо олмыштыжо – кÿшыл мучаште, пÿя вес могырно, курык вуйышто (кызыт тушто мланде яра кия) 700 утла пушеҥге шындалтын: 500 кож (лестничестве гыч лÿмын налме), молыжо – куэ, писте, пызле да сирень.

DSC02668.JPG

Парклан мландым верысе сельсовет ойырен (вуйлатышыже Арсений Алексеевич Андреев). Ты поро сомылым Тымбай ялыште Ямакай тукым тÿҥалын. Пушеҥгым шындаш 22 еҥ погынен. Ямакайын уныкаже-влак Йошкар-Ола, Нефтекамск, Бирск олала, Мишкан села да Тымбай ял гыч лийыныт, тыгак пошкудо-влак кумылын ушненыт.

Tumbaj1-Arslan.jpg

Пÿртÿс мыланна эн сай игечым пöлеклен: кечыгут йÿр шыжен гынат, пушеҥгым шындыше-влакым нимат лÿдыктен огыл.

А тиддеч ончыч, Тымбай ялыште илыше Валерий Ямакаев ден тудын Ростислав эргыжын вуйлатымышт почеш, ялысе самырык-влак эҥер гоч чапле кÿварым чоҥен шынденыт. Чыла тиде шушаш пайрем вашеш ышталтын.

Тений кеҥежым, 28 июньышто, Тымбай ялын кугу пайремже лиеш. Яллан – 500 наре ий! Тиде кечынак историйыште икымше гана Ямакайын тукымвож пайремже лиеш. Тушко Россий мучко илыше родо-тукым погына. Лач тунам Ямакайын уныкаж ден кугезе-кугезе уныкаже-влак Тымбай ялын паркшым официально почыт.

Автор: Алевтина Кузнецова, Йошкар-Ола.

Tumbaj2-Arslan.jpg

DSC02669.JPG

DSC08473.JPG

DSC08478.JPG

Tumbaj-Arslan.jpg

Икымше лаштыкыш пöртылаш>>>

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.