Кугу Сеҥымаш - Икоян Шочмо Эл: Кочам дене кугешнем

Вход на сайт

Kosham_Arslan.pngАйдемын илышыже лым лийде йогышо эҥер дене иктак. Изеҥер кугурак вӱдыш ушна, но теҥызыш йоген пура гын, лӱмжӧ йомеш. Айдемынат тыгак: ӱмыржӧ шуэшат, ош тӱня дене чеверласа. Пагыт эртыме семын лӱмжӧ йомеш, тудым йӧршеш монден кертыт. Тыге лийшаш огыл!

1942 ийыште 26 ияш самырык рвезым - мыйын кочам - Тимербулат Шагиевич Ахмеровым, армий радамыш налыныт. Кугу Ачамланде сарыште визымше ударный фронтышто связист-влакын командирышт лийын.

1943 ий. Шыже. Немыч-влак янлыкла тӧченыт: тӱжем дене яллам йӱлатеныт, еҥ-влакым пуштеденыт. Кочамын частьше орланен илыше украин калыкын мландыжым утараш приказым налын. Генерал-лейтенант Берзаринын командованийже почеш Днепр эҥерым штурмоватлаш тӱҥалыныт. Связист пошкудо частьла дене эре кылым кучен шоген. Ик жаплан кыл кӱрлын. Мо лийын? Сержант Ахмеров амалым пален налаш каен. Уто йӱкым лукташ ок лий: мӱндырнӧ огыл немыч-влак лийыныт. Линий чодыра гоч шуйнен. Кӱрлын кайыме верым связист вашке муын. Кенета шеҥгелныже йолйӱк шоктен. Савырнен ончалын – немыч. Тиде обер-лейтенантым кочам частьышкыже конден.

Сар корно кужу лийын. Кочам Берлин ола марте миен шуын. Сусыргышо гынат, 1946 ийыште шочмо кундемышкыже эсен пӧртылын.

Фронтышто ончыклык тукымын пиалан илышыже верч кучедалмыжлан сержант Тимербулат Ахмеровым Йошкар Шӱдыр орден да 13 медаль дене наградитленыт.

Мый кочам дене кугешнем. Кугу Ачамланде сарын ветеранже-влаклан вуем савем, пиалан илышлан таум ойлем.

Автор: Виктор Галиев, 8-ше класс тунемше,
Татарстан Республик Актаныш район Мари-Суксо школ.

Вуйлатыше: Ирина Александровна Галиева.

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.