У мутым ыштена: «лаштыкъеҥ» да «блогъеҥ»

Вход на сайт

Марий кугыжаныш университетын доцентше Валентина Григорьевна Гаврилова «Мут ышталтмаш» кружокым чумырен. Кружокын тӱҥ сомылжо – вес йылмыла гыч пурышо мут-влаклан марий сынан у мутым ыштымаш. Тиде пашашке чыла кумылан студент ушнен кертеш.

123_1.png

Шукерте огыл кружокын икымше занятийже эртен. Студент-шамыч «блогым вӱдаш» да «блоггер» шомакым марлаҥдаш тыршеныт.

Эн ондак нине мут-влакын мом ончыктымыштым рашемдыме, вара шымлен лекме, марий йылмыште глагол могай йӧн дене ышталт кертеш. Глагол суффикс-влакым шерын лекмек, эн келшышылан -л пале шотлалтын. Тыге «сатулаш» гай глагол-влак семын «блог+л+аш» глагол ышталтын. Студент-влакын шонымышт почеш, тиде мут марий йылмын законжо почеш чоҥалтын, значенийым пӱтынек почын пуа, умылаш лийше.

Лӱм мутым ыштыме йӧн кокла гыч кокытшо келшен толын: суффикс полшымо да мутым ушымо дене. Мутлан, марий йылмыште -че, (-чо, -чӧ), -зе, (-зо, -зӧ) суффикс дене ик лӱм мут гыч вес лӱм мутым ышташ лиеш, мутлан: кӱтӱчӧ, колызо. Тидын семынак «блоггер» умылымашым ончыкташ студент-влак «блогчо» да «блог(ы)зо» вариант-влакым темленыт, но нуно шукыштлан келшен огытыл. Вара вес йӧным кучылтмо: марий йылмыште -ше (-шо, -шӧ) суффикс полшымо дене глагол гыч действийым ыштыше еҥым ончыкташ лӱм мутым ышташ лиеш, мутлан, туныктышо. Тидын семынак «блоглаш» глагол гыч «блогл+ы+шо» шомакым ышташ лиеш. Кружокын членже-влаклан тиде утларак келшен. Мутушалтмаш йӧн дене кок вариантым ончымо: «лаштыкъеҥ» да «блогъеҥ». «Лаштык» шомак сайт значений дене кучылталтын.

Чыла терген, ӱчашен, каҥашен лекмек, эн сайлан блоглаш «блогым вӱдаш» да блоглышо, блогъеҥ «блогын озаже» у мут-влак ойыралтыныт, нуно шукыштлан келшеныт.

Нине мут-влак йылмыш шыҥдаралтышт, нуным кучылтышт манын, мут-шамыч дене моло-влакымат палдарыман.

Шочмо йылмынан мутвундыжым у шомак дене пойдараш кӱлеш, лач тыге гына марий йылме умбакыже вияҥын, кучылталтме кумдыкшым шарен кертеш.

Автор: Андрей Кошаев.
Налме вер: http://finnblogger.livejournal.com.

МАРИЙ БЛОГГЕР ШКОЛ! - ШКОЛА МАРИЙСКОГО БЛОГГЕРА!

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.