Пеҥгыде кыл: Марий студент-влак Удмуртийыште тунемыт

Теве ынде икмыняр ий почела Марий кугыжаныш университетыште тунемше-влакым Ижевск олаште верланыше Удмурт кугыжаныш университетысе студент-влак дене алмаштат. Тыгай программе ончычсо Финноугроведений, а кызыт Калыкле тӱвыра да тӱвыра-влак кокласе коммуникаций институт да Удмурт филологий институт коклаште пеҥгыдемдалтын.

Тений калыкле тӱвыра да тӱвыра-влак кокласе коммуникаций институт гыч кок ӱдыр, Людмила Карпова ден Соловьёва, шке шочмо кундемжым коден, вес олашке тунемаш кудалын. Нунын олмеш кызыт Йошкар-Олаште кок удмурт ӱдыр, Елена Орлова ден Наталья Игнатьева, нунын семынак толыныт.

Людмила Карпова ден Елена Соловьёва нылымше ий МарКУ-што шинчымашым погат, но Удмурт кугыжаныш университетыште тӱрлӧ курсысо занятийыш коштыт. Сентябрь тылзе гыч у ий марте тыште удмурт, венгр, финн йылмылам тунемыт. Тыгак вес дисциплине-влак денат уш-акылыштым пеҥгыдемдат. Мучашлан зачёт ден экзамен-влакым кучаш тӱҥалыт, но эше шке университетышкышт пӧртылмек, марий йылме да литератур дене вийыштым тергат. Тидланже шке семын шуко ямдылалташ кӱлеш.

Тений Людмила ден Елена Удмуртийыштак практикым эртат да кумылан-влаклан марий йылмым туныкташ тӱҥалыт, а тыгай кумыланже ятырак улыт.

Марий студент-шамыч тунемме деч яра жапыштымат пайдалын эртарат: театрыште лиедат, олам ончат, шукерте огыл «Лудорвай» тоштерыш миеныт, «Ӱжара» марий самырык ушемыш пуреныт, тыгак эше куштышо да мурышо «Чипчирган» удмурт ансамбльыш кошташ кумылышт уло. Самырык ӱдыр-влак шуко у йолташым муыныт да шкеныштым чолган кучат.

Кеч тораште улыт гынат, чонышт Марий Элыштак. Нуно шке ача-аваштым, йолташ-влакыштым ушаненыт. «Марий йылме деч посна йокрок, тыштыже тудым шагал годым веле колаш перна, но мемнам марий поэт-писатель-влакын возымышт лыпландарат», - маныт студентка-влак.

Мӱндыр мландыште лиймышт ӱдыр-влакым шочмо йылмым йӧраташ, ача-аваштым пагалаш чотрак туныкта. А тыгай алмашталтмаш моткоч сай, кӱлешан.

Автор: Людмила Карпова.