24 январьыште Йошкар-Ола тоштерыште икымше Марий Оньыжа, режиссёр, Марий Эл сымыктышын сулло деятельже, Марий Эл Кугыжаныш премийын лауреатше Василий Александрович Пектеевын усталык касше эрта. Тудо палыме еҥын 60 ияш лӱмгечыжлан пӧлеклалтын.

17 октябрьыште (тошто дене 29 октябрьыште) кумдан палыме писатель, драматург, Марий театрым ыштымаште кугу рольым модшо чолга марий еҥ М.Шкетанын (Яков Павлович Майоров) шочмыжлан 115 ий темеш. Тиде кечын Йошкар-Оласе М.Шкетан памятник воктеке (М.Шкетан лӱмеш драме театр пелен) самырык-шамыч чумыргеныт. Нунын дене пырля Марий тӱвыра рӱдерым вуйлатыше, драматург Валерий Григорьев ден Марий писатель ушемым вуйлатыше, поэтессе Светлана Архипова лийыныт. Тӱшкашке театрыш Параньга район Матародо школ гыч толшо туныктышо-влакат ушненыт.

6 октябрьыште марий классик Сергей Григорьевич Чавайнын шочмыжлан 125 ий темеш. Писатель 1888 ий 6 октябрьыште Морко район Изи Корамас ялыште шочын, тудым 1937 ий 11 ноябрьыште лӱен пуштыныт. Марий сылнымут мастар моткоч шуко да тӱрлӧ сынан произведенийым возен коден. Ик эн палымыже - "Ото" почеламут.. Тыгак - "Элнет" роман, "Мӱкш отар", "Акпатыр" драме-влак да молат. Тений Марий Элыште ятыр мероприятий ты лӱмгечылан пӧлеклалтын.