1919 ий 29 ноябрьым Марий кугыжаныш драме театрын шочмо кечыжлан шотлат. Тиде кечын Тыныш Осыпын пьесыж почеш икымше гана марий спектакльым ончыктеныт.

17 октябрьыште (тошто дене 29 октябрьыште) кумдан палыме писатель, драматург, Марий театрым ыштымаште кугу рольым модшо чолга марий еҥ М.Шкетанын (Яков Павлович Майоров) шочмыжлан 115 ий темеш. Тиде кечын Йошкар-Оласе М.Шкетан памятник воктеке (М.Шкетан лӱмеш драме театр пелен) самырык-шамыч чумыргеныт. Нунын дене пырля Марий тӱвыра рӱдерым вуйлатыше, драматург Валерий Григорьев ден Марий писатель ушемым вуйлатыше, поэтессе Светлана Архипова лийыныт. Тӱшкашке театрыш Параньга район Матародо школ гыч толшо туныктышо-влакат ушненыт.