Йошкар-Олаште "Пеледыш пайрем" регион-влак кокласе марий тӱвыра пайрем гӱжлыш (фото)

Вход на сайт

21 июньышто Йошкар-Олаште марий тӱвыран регион-влак кокласе «Пеледыш пайремже» эртыш. Пайремым торжественно почмаште Марий Элым вуйлатыше Леонид Маркелов лийын. Тудо погынышо калыклан улан да тӱзланен илаш, пайремым чаплын эртарен колташ тыланен.

IMG_2631-.jpg

«Пеледыш пайремым» почмаште тыгак РФ Кугыжаныш Думын депутатше Лариса Яковлева, РМЭ-ште тӱҥ федерал инспектор Роман Береснев, тӱвыра, печать да калык-влакын пашашт шотышто министрын алмаштышыже Галина Ширяева саламлыме мутым ойленыт.

Пайрем кумылан калыкым Марий Оньыжа – Мер Каҥашым вуйлатыше, Марий Эл Кугыжаныш Погын Председательын алмаштышыже Анатолий Иванов саламлен. Тудо Кугыжаныш Погынын Чап кагазшым шуко шочшан Александровмыт ешлан кучыктен. Тиде еш шукерте огыл «Юлкундемысе ончыл еш» округ кумдыкан таҥӱчаш-фестивальыште лийын.

IMG_2640-.jpg

Йошкар-Олаште илыше да тудын унаже-влакым марий калыкын тӱҥ онаеҥже Александр Таныгин саламлен да сугыньмутым каласен.

IMG_2703-.jpg

«Пеледыш пайрем» Марий Элын рӱдолашкыже ик кугу мотор пеледыш аршаш семын республикысе тӱрлӧ районла гыч, тыгак Башкортостан, Татарстан, Удмуртий, Киров, Угарман, Свердловск, Пермь кундемла гыч родо-тукымна-влак погыненыт ыле. Ты гана марийын илыш-йӱлаже да тӱвыраже дене РФ-се Финн-угор СМИ-н VI форумышкыжо толшо журналист-влакат палыме лийын кертыныт.

Ты кечын йӱлаш пурышо Агавайрем эртаралтын, делегаций-влак землячествышт дене вашлийыныт, ола уремла дене рўж погынен каеныт. Кажне мероприятият пеш оҥай лийын, вет тушто муро йоҥген, чон каналтен кушталташ лийын, тамле пура да вужга мелна дене сийленыт. А кажне делегацийын чиемже могай сылне ыле – чылт шонанпылла але олыкысо тӱрлӧ-тӱрлӧ пеледышла шыри-вури волгалтын!

IMG_2469-.jpg

«Пеледыш пайрем» шошо агам мучашлыме дене кылдалтын, сандене ты пайрем годым эртак ялозанлык пашаеҥ-влакым саламлат. Республикысе ялозанлык да кочкыш министрын алмаштышыже Антон Хлопов ойыртемалтше район-влакым, озанлык да механизатор-влакым саламлен. Эн сай муниципал район семын Советский районым палемдыме (вуйлатышыже Валентин Епифанов).

IMG_2685-.jpg

«Кудо» конкурсышто шке мастарлыкшым 14 участник ончыктен: тышке республикысе 12 муниципал район, Башкортостан да «Марий Эл» газет ушнен. Икымше верым Кужэҥер кундемын «Кудыжо» сеҥен налын.

Моткоч сайын, кумылым нӧлтышын эртыш «Мелна пайрем». Тудым марий ӱдырамаш-влакын «Саскавий» ушемышт чумырен. Тышке 17 участник ушнен, нуно калыклан ончалаш да тамлаш 30 утла тӱрлӧ мелнам темленыт. Мелна оза-влакым чылаштымат шарнымашан пӧлек дене палемдыме.

IMG_2721-.jpg

Спорт таҥасымаште сеҥышыш лектыныт: Денис Хайруллин (чимарий кучедалмаш), Владимир Веденеев (кидвийым тергымаш, кирам нӧлтымаш).

«Шокто, гармонь!» таҥӱчашыште республика гыч да туддеч ӧрдыж гыч толшо 10 еҥ усталыкшым ончыктен.

«Йыр куштымаш» республик кӱкшытан фестивальыш 500 утла еҥ ушнен. Куштымаш варажым икшырымын гына этнодискотекыш куснен. Тыште марий эстрадын шӱдыржӧ-влак калыклан сай деч сай кумылым пӧлекленыт.

«Пеледыш пайремым» ямдылаш да эртарен колташ кугу вийым пыштеныт: Республикысе марий тӱвыра рӱдер, Мер Каҥаш, Я.Эшпай лӱмеш Марий кугыжаныш филармоний, М.Шкетан лӱмеш Марий кугыжаныш драме театр, И.С.Палантай лӱмеш республикысе тӱвыра да сымыктыш колледж, Йошкар-Оласе тӱвыра управлений, «Саскавий» марий ӱдырамаш ушем, Самырык-влакын «Рвезылык» усталык ушемышт. Пайремын учредительже: Марий Элысе Тӱвыра, печать да калык-влакын пашашт шотышто министерстве, Ялозанлык да кочкыш министерстве, Мер Каҥаш. Проектым «2013-2020 ийлан Марий Эл Республикын кугыжаныш национальный политикыже» республикысе целевой программе кышкареш илышыш шыҥдарыме.

Ушештарена, «Йошкар Пеледыш пайрем» икымше гана Шернур кантонышто 1920 ий 27-29 майыште эртаралтын. Тудым пайремлыме икымше кечылан марий калыкын «Семык» пайремым эртарыме икымше кечыжым ойырен налме. 1928 ий кеҥежым Йошкар пеледыш пайрем Марий автономный область деч ӧрдыжкат вончен. Тудо Вотский (Удмурт) автономный областьысе, Татар АССР-ын Алабога кантонысо да Башкир АССР-ысе марий яллаште лийын. Но 1930-шо ийла тӱҥалтыште «буржуазный националист-влак» дене кучедалаш тӱҥалме амал дене пайрем эркышнен да варажым йӧршеш эртаралтмым чарнен. Тудым уэш 1965 ийыште веле ылыжтыме: 20 июньышто республикысе районлаште, 27 июньышто Йошкар-Олаште пайремлыме. 1996 ий гыч 12 июньышто, Россий Кечым паледыме дене пырля, пайремлаш тӱҥалме. Тудо марий калыкын тӱҥ пайремышкыже савырнен, шке помышкыжо кызытат пайремлыме Агавайрамын, Семыкын да Сӱремын сыныштым чак ушен. А нине пайрем-влак калыкын тошто кечышотыштыжо Йӱдым да Тылзым алмаштыше Ӱжара да Кече дене чак кылдалтыныт.

Таче «Пеледыш пайрем» марий калыкын чон кумылжым почын ончыктышо волгыдо, йӧратыме пайремышке савырнен. «Пеледыш пайрем» - марий калыкын тӱвыра чурийже.

Геннадий Сабанцев кусарен.

IMG_2623-.jpg

IMG_2409-.jpg

IMG_2413-.jpg

IMG_2435-.jpg

IMG_2436-.jpg

IMG_2439-.jpg

IMG_2460-.jpg

IMG_2495-.jpg

IMG_2501-.jpg

IMG_2513-.jpg

IMG_2617-.jpg

IMG_2528-.jpg

IMG_2625-.jpg

IMG_2642-.jpg

IMG_2647-.jpg

IMG_2709-.jpg

IMG_2729-.jpg

IMG_2731-.jpg

IMG_2734-.jpg

IMG_2742-.jpg

IMG_2759-.jpg

IMG_2791-.jpg

IMG_2812-.jpg

IMG_2978-.jpg

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.