Йошкар-Олан чапшым Республикысе «Колумб лудмаште» кӧ аралаш тӱҥалеш?

«Колумб лудмаш» оласе поэзий конкурс 21 майыште Йошкар-Оласе 9-ше №-ан школышто эртыш. Тушко, куд ий гыч тӱҥалын, 37 йоча, самырыкъеҥ (марий, руш, азербайджан) ушныш. Поэтын почеламутшо-влак тӱҥ шотышто марла йоҥгышт, но рушлат лудшо-влак лийыч. Тыгак 29-ше №-ан школын туныктышыжо Алевтина Маркова сылнымутым эстонла мастарын лудын ончыктыш.

Чумыргышо-влакым Республикысе марий тӱвыра рӱдерым вуйлатыше Валерий Григорьев, Валентин Колумб лӱмеш рӱдер-тоштерым вуйлатыше Владимир Козлов пайрем дене саламлышт.

А конкурсыш ушнышо-влакым ушан жюри аклыш. Тиде - Зоя Константиновна Иванова (филологий науко кандидат, Марий кугыжаныш университетын доцентше, Марий Эл Республикысе тӱвыран сулло пашаеҥже, РФ-ысе кӱшыл профессионал образованийын отличникше), Людмила Ивановна Кошкина (Республикысе марий тӱвыра рӱдерысе тӱшка тӱвыра паша шотышто пӧлкам вуйлатыше, РФ-ысе калык образованийын отличникше) да жюри председатель Татьяна Александровна Иванова (Пчёлкина) Олык Ипай лӱмеш кугыжаныш премийын лауреатше, РФ-ысе писатель ушемын еҥже, «Кугарня» республикысе газетын журналистше).

Тыге конкурсыш ушнышо-влакым кок номинаций дене акленыт. «Колумбын сылнымутшым сӱрет гоч ончыктымаш» номинаций заочно эртен. Тушко 23 паша пурен. 1-ше верыш Елизавета Егорова (27-ше №ан школ, вуйлатыше – Галина Сергеева Данилова) лектын. 2-шо вер – Мариян Буханован (1-ше №-ан школ, вуйлатыше – Надежда Николаевна Кудряшова) 3-шо верым кок еҥ пайлен: Инесса Маркова (Марий Эл Республикысе президент школ-интернат, вуйлатыше – Алёна Алексеевна Ямбарцева) ден Дмитрий Александров (3-шо №-ан школ, Елена Семёновна Зыкова).

«В.Колумбын почеламутшым сылнын лудмаш» номинацийым ийгот кышкар дене шелме. 12 ий марте 15 йоча лийын, ик эн изиже – куд ияш Павел Никитин, Колумбын тукым уныкаже. Ты ийгот кышкарыште 1-ше верым Ульяна Чемекова (1-ше №-ан школ, вуйлатыше - Валентина Ивановна Рыбакова) сулен. Кокымшыш Ирина Кугергина (21-ше №-ан школ, вуйлатыше - Оксана Николаевна Васенина) лектын. Кумшо вер - Иван Втюринын (7-ше №ан школ, вуйлатыше - Ирина Вячеславовна Закиева).

12-16 ияш коклаште 15 еҥ лийын, да икымше верым Анастасия Пчёлкина (2-шо №-ан школ, вуйлатыше - Татьяна Николаевна Гребнева) сеҥен налын. Кокымшо вер - Ольга Васильеван (14-ше №-ан школ, вуйлатыше - Людмила Николаевна Никитина). Кумшо вер - Сейран Шахбаз-кызы Агамалиеван (3-шо №-ан школ, вуйлатыше - Елена Семёновна Зыкова).

16 ий деч кугурак коклашке шым еҥ ушнен, 1-ше вер дене Христина Ивановам (МарГУ, ИКНиМН, вуйлатыше - Светлана Александровна Малинина) палемдыме. Кокымшо верым Анна Иванова (21-ше №-ан школ, вуйлатыше - Оксана Николаевна Васенина) налын. Кумшо вер - Алексей Алексеевын (Йошкар-Оласе аграрный колледж, вуйлатыше - Елена Леонидовна Иванова).

Конкурсын кажне участникше сертификат дене палемдалтын, пӧлек шотеш «Ямде лий» газетым кучыктеныт. А сеҥыше-влакым Чап танык да книга пӧлек дене палемдыме.

Икымше верыш лекше-влак Йошкар-Олан чапшым Республикысе «Колумб лудмаш» поэзий конкурсышто аралаш тӱҥалыт. Ты конкурс 27 июньышто Морко посёлкышто лиеш. Тений тудо 25-ше гана эртаралтеш.

Автор: Эльвира Куклина.