«Мый марла ойлем» акцийыш ушныза!

Вход на сайт

a_2a604f9d.jpg29 апрельыште 17 шагатлан Йошкар-Оласе Чарла Кремльыште «Мый марла ойлем!» акций эртаралтеш. Тушко чыла кумылан-влакым пагален ӱжына! Акцийыште самырык-влаклан пӧлеклалтше сылне, ушеш кодшо программе вуча!!! Тыгай Акцийым республикысе район ден олалаштат, марий-влакын тӱшкан илыме кундемлаштат эртараш лиеш. Тидлан чынжымак кумыл гына лийже! Ушныза!

«Мый марла ойлем» Акций ынде илыш-йӱлаш пурен – куд ий почела тудо талук еда кӱрылтде эртаралтеш. Тиде шонымашым эн ондак Культур-влак коклаште вашкылым ыштыше «ВийАр» ушемын чулымъеҥже-влак илышыш шыҥдареныт.
Жап эртыме семын Акций утларак кумдан шарла, у деч у йолташым пога, Марий Эл деч ӧрдыжкат, марий-влакын тӱшкан илыме кундемлаш, лектеш.

Тиде гана Акцийым Республикысе Марий тӱвыра рӱдер чумыра, окса полышым Марий Элысе Тӱвыра, печать да калык-влакын пашашт шотышто министерстве пуа. Ты кӱлешан пашаш тыгак «ВийАр» мер ушем, «Чарласе Кремль» тӱвыра да историй комплекс, Республикысе Самырык-влакын Правительствышт – калык-влак кокласе кылым вияҥдыме шотышто группо, РФ-се Финн-угор университет-влакын студент ден аспирантыштын ассоциацийышт, Республикысе И.С.Палантай лӱмеш тӱвыра да сымыктыш колледжын тунемшыже-влак ушнат.

Мемнан тӱҥ шонымашна: шочмо йылмым, калыкын культурыжым арален кодаш да умбакыже вияҥдаш.

Пайрем эртыме жапыште «Мый марла ойлем!» акцийын палыж-влакан значокым, «Марла кутырыктыш» буклетым шаркалаш тӱҥалыт. Тылеч ончыч «Олаште илыше-влак марий йылмым могайрак кӱкшытыштӧ палат» манме йодыштмашым эртарыме. 2014 ийыште инициативым ончыктышо тӱшка эше ик гана Йошкар-Олаште увер-влакым палдарымым марла чын возымым терген лектеш.

Акций сылне концерт дене мучашлалтеш. Тушто эстрадын самырык мурызыжо, фольклор коллектив-влак шке усталыкыштым ончыктат. Тенийысе концертын ойыртемалтше могыржо: сылнымут йоҥгалтеш, шуко куштымаш лиеш; концертыште тӱрлӧ калык-влакын усталык коллективыштат выступатлат.

Чыладамат пагален, Акцийым чумырышо-влак.

Mari
Tags: 
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.