29 мартыште Йошкар-Олаште «Изи памаш» йоча фольклор ансамбльын 30 ияш лӱмгечыжлан пӧлеклалтше пайрем концерт эртыш. Ансамбльын участникше-влакым Республикысе марий тӱвыра рӱдер лӱм дене рӱдерын методистше Галина Ласточкина саламлыш да йоча-влаклан тамле пӧлекым кучыктыш.

Галина Ласточкина «Изи памаш» ансамбльыш коштшо ӱдыр-рвезе-влакын чолгалыкышт нерген палемдыш. Нуно Тӱвыра рӱдерын эртарыме ятыр мероприятийыштыже: У ий пайремыште, «Пеледше тукым» ден «Самырыктукым» конкурслаште – шке мастарлыкыштым ончыктат. «Ончыкшымат тыгаяк чулым лийза, мастарлыкдам эреак шуарен шогыза, марий йылмынам, тӱвыранам йӧратен кушса», - тыланыш Марий тӱвыра рӱдерын пашаеҥже.

Пайремым «Шокто, гармонь» ден «Шӱшпык» йоча фольклор ансамбль-влак, «Изи шӱдыр» хореографий ансамбль, «Каче-влак» группо, «Изи памаш» ансамбльын ончычсо участникше-влак сӧрастарышт.

А «Изи памаш» ансамбльым 1984 ийыште Калык усталык да культурканыш паша шотышто республикысе шанче-методик рӱдер Медведево район Сенькан школ пелен почын. Тыге 30 ий жапыште тӱрло кӱкшытан конкурслаште участвоватленыт. Таче тушко 6 гыч 13 ий марте 30 еҥ коштеш, да тугак ансамбль марий калыкын тӱвыра поянлыкшым аралаш полша.

Налме вер: http://www.mari-centr.ru.

• Юбилейный концерт, посвящённый 30-летию детского образцового фольклорного ансамбля «Изи памаш» («Родничек»)