Йошкар-Олаште Ӱярня пайрем гӱжлыш (фото, видео)

Вход на сайт

Тений Ӱярня арня 24 февраль гыч 2 март йотке шуйныш. Арня мучко мелнам кӱэштна гын, 1 да 2 мартыште Йошкар-Олаште республик кӱкшытан кугу пайремым Марий Элысе тӱвыра рӱдер калыклан пӧлеклыш. Икымше кечын Ленин лӱмеш тӱвыра полатыште Марий кас кышкарыште пайрем гӱжлыш, а вес кечын «Телерадио» компаний дене пырля Патриарший плошадьыште, модын-воштыл, куштен-мурен, телым ужатышна да шошым вашлийна.

IMG_5749-.jpg

Икымше кечын Ӱярня пайрем Тӱвыра пӧрт ончылно тӱҥале. Кинде-шинчал, мелна кышыл дене калыкым вашлийыч, модыш-влакым эртарышт, марий сем почеш куштыктышт. Вара программе пӧрт кӧргыш кусныш – чумыргышо-влак умбакыже кап-кылым лывыртышт. Тыге касым фольклор ансамбль-влак – Киров кундем Кильмезь гыч «Марий сем», Марий Эл Советский посёлко гыч «Кугезе кумыл» да Йошкар-Ола гыч «Чон оҥгыр» - сӧрастарышт. Шке тамым пуртышт Ӱярня кува (Лариса Сидоркина) ден Ӱярня кугыза (Эдуард Яковлев) герой-влак. Нунак тӱрыс программым вӱдышт.

А рушарнян моткоч шуко калык Патриарший площадьыш толын. Тушто 11 шагат эр гычак ончер-ужалымаш пашам ыштен: тӱрлӧ мастар еҥ сылне деч сылне пашажым калыклан темлен, кочкыш йӧрварымат налаш лийын. Чаманаш логалеш, мелнам гына шагал ужаленыт.

IMG_5670-.jpg

IMG_5671-.jpg

IMG_5679-.jpg

IMG_5686-.jpg

Тиде кечын руш да марий калык модыш-влак дене модыныт, курык гыч мунчалтеныт, марий-руш концертым онченыт. Калык кумылым нӧлтеныт «Марий сем» (Киров кундем Кильмезь) ден «Ший аршаш» (Кужэҥер район Токтайбеляк) фольклор ансамбль-влак, «Мурпеледыш» (Параньга район Усола) мурышо калык ансамбль, «Каче-влак» группо, мурызо Лариса Сидоркина да молат.

IMG_5878-.jpg

Пайремым руш да марий вӱдышӧ-герой-влак моткоч сылнын да ик шӱлыш дене вӱденыт.

Мучаште, чыла осалым иктыш чумырен, Ӱярня курчакым йӱлатеныт.

Саман вашталт да уэм толеш гынат, илышыштына йӱлалан посна вер эре лийшаш, тыге ме шке чурийнам, койыш-шоктышнам арален кодена. А тӱрлӧ калыкын пайремым пырля эртарымыже умбакыжат келшен илаш, икте-весе коклаште кылым пеҥгыдемдаш полша.

Автор: Эльвира Куклина.

Марий Эл ТВ-ын репортажше.

IMG_5717-.jpg

IMG_5756-.jpg

IMG_5759-.jpg

IMG_5801-.jpg

IMG_5814-_0.jpg

IMG_5831-.jpg

IMG_5886-.jpg

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.