У мурпого: «Марий йӱла пайрем муро-влак»

Вход на сайт

001-.jpgӰмаште (2013 ий) «Марий йӱла пайрем муро-влак» нот ден погымо мурпогыш книга ош тӱням ужын. Тушко Марий тӱвыра рӱдерын «Чон оҥгыр» фольклор ансамбльын репертуарже да Дмитрий Кульшетовын «Шернур корнет» сборникше гыч муро-влак пуреныт. Школышто тунемше, студент, мурсемым йӧратыше да тудын деке кумылаҥдыше-влаклан пӧлеклалтеш.

Ты книга проектлан шийвундым «Этнокультуное развитие Республики Марий Эл (2009-2013гг.)» республикысе целевой программе гоч ойырымо.

Кузе книгаште палемдыме, марий калыкын пайрем мурыжо-влак паша дене чак кылдалтыныт. Марий айдеме кеч-кунамат пӱртӱс вашталтышлан келшышын шке озанлык сомылжым тӧрла. Пайрем пелен йӱла муро-влакат шке верыштым айлат.

«Шорыкйол» пайрем у идалык, у ий толмо нерген шижтара, сандене мурыжат тиде жапланак келыштаралтше.

Шошым, кечын иктӧр улмыж годым, Ӱярня пайрем палемдалтеш. Тиде пайрем утларак весела. Марий калык, телым ужатымек, кап-кылжым куштылемдаш, шке озанлыкшым улаҥдаш шонен тӱрлӧ йӧным кычалеш: йолкурык гыч мучалтен, мланде паша дене кылдалтше модыш дене модеш, родо да уна толмо годым мурым мура. Тудо икте-весын кумылжым нӧлтен, мланде пашалан кумылаҥден шога. Ӱярнялан келшыше муро-влак ятырак аралалт кодыныт.

Кугече пӱртӱс илыш ылыжме кечым ончыкта. Ӱдыр-рвезе-влак лӱҥалтыш дене лӱҥгалтат, тӱрлӧ модыш, муро да куштымаш дене пайремым эртарат. Муро-влак йӧратымаш тематикылан поян.

Тиде мурпогышко «Шорыкйол», «Ӱярня», «Кугече», «У саска» пайрем-влаклан муро-шамыч пуреныт. Тудым школлаште, тӱвыра пӧртлаште мероприятийым ямдылыме годым ямлын кучылташ лиеш. Кушкын толшо тукым марий пайрем муро-влакым у шӱлыш дене мураш тӱҥалеш.

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.