Мер Каҥаш еҥ-влак школлаште шочмо йылмым туныктымым тергаш тӱҥалыт

Вход на сайт

13 ноябрьыште Мер Каҥаш вуйверын погынымашыже эртен. Ик эн пӱсӧ йодыш: марий йылмым туныктымо паша нерген Марий туныктыш да шанче министерствын уверже шотышто. Ты увер марий чоным йӧршынат огеш куандаре. Лишыл жапыште Мер Каҥашын еҥже-влак ялысе школлашке лектын кошташ да марий йылмым кузе туныктымым ончаш палемденыт.

Чынже денак, таче ме ятыр вере тыгай сӱретым ужына: чылт марий ялыште шочмо йылмым кугыжаныш йылме семын тунемаш тӱҥалыныт, школлаште маровед-влакат шагалемыт. Тидын нергенак чон вургыж ойлышт Мер Каҥашын еҥже-влак. Мер тергымаш ала иктаж сай ошкылым ышташ полша!?

Мер Каҥаш вуйвер погынымаш годым Марий форум шыже сессийын лектышыж ден пунчалжым шуктымо, Тиште кечым ямдылыме да эртыме нерген ойлышт. 10 декабрьыште 10 шагатлан Марий кугыжаныш университетыште тунемше ден туныктышо-влак диктантым возаш тӱҥалыт. Сеҥышым кастене Тиште кечылан пӧлеклалтше пайремыште саламлат. Пайрем Йошкар-Олаште Курчак театрыште эрта. Тушто туныктышо, шымлызе-влакым палемдат, тале писатель-влак нерген каласкалат. Тамга выставке лиеш.

Тыгак мер активист-шамыч Марий автономий областьысе Областной Совет ЦИК-ын икымше председательже Иван Петровын шочмыжлан 120 ий теме лӱмеш шочмо Шеҥше селаштыже (Морко р-н, Марий Эл) бюстым почмо нерген мутланышт. Тудым 13 декабрьыште шогалтат. А кызыт тидлан шийвундым погат – поро кумылым ончыктышо концерт-влакым эртарат. Тыгай концерт 8 ноябрьыште Моркышто лийын, а 29 ноябрьыште М.Шкетан лӱмеш Марий кугыжаныш драме театрыште (Йошкар-Ола) вучат. Эстраде шӱдырын концертышт 18 шагатлан тӱҥалеш.

Эн тӱҥжӧ: Мер Каҥаш еҥ-влаклан шыже сессийыште пеҥгыдемдыме резолюций почеш пашам ворандарен колташ.

Автор: Эльвира Куклина.

IMG_0804-.jpg

IMG_0803-.jpg

IMG_0801-.jpg

IMG_0799-.jpg

IMG_0797-.jpg

IMG_0796-.jpg

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.