«МАРИКИНО» ик ияш пашажым иктешла

Вход на сайт

«МАРИКИНО» студий вашке ик ияш шочмо кечыжым палемдаш тӱҥалеш. Тудо амалкалче Николай Мамаевлан кӧра ӱмаште 9 ноябрьыште шочын. Тений тиде кечын «МАРИКИНО» шке пайремжым М.Шкетан лӱмеш Марий кугыжаныш драме театрыште палемда – шкешотан концерт 18 шагатлан тӱҥалеш. Тунам студийын ик ияш паша лектышыжым иктешлат, да «Вис-вис пушан орлыкем» телеспектаклян DVD-дискым налше-влак коклаште шергакан пӧлек-влак модылтыт: плазман телевизор, Samsung холодильник, тумо печке да молат.

Ик ий шуко огыл, айдеме илыш дене таҥастараш гын, лач йолымбаке шогалме пагыт гына. Но «МАРИКИНОн» саскажат уло. Ты жаплан кум телеспектакльым сниматлен: Марий самырык театрын «Изуремыште кугу сӱан» (В.Абукаев-Эмгак) комедийже ден «Вис-вис пушан орлыкем» (З.Долгова) драмым да М.Шкетан лӱмеш Марий драме театрын «Кугезе муро» (В.Регеж-Горохов) драмыжым. Тыгак кеҥежым лӱмгечан Пеледыш пайремым войзен, илен-толын, документальный фильм лийшаш.

Кеҥеж мучко да сентябрьыштат тылзылан ик гана «МАРИКИНО» Йошкар-Оласе Чарла Кремльыште «Чон ӱжеш Марий паркыш» каныме кас-влакым эртарен. Кажне кас шке тематикыж дене ойыртемалтын: икыже кеҥеж пагытлан пӧлеклан гын, весыште гармоньчо-влак коклаште конкурс эртен, кумшо марла да эстонла кушташ туныктен, нылымше самырык пагытым моктен. Тушто финн, эстон-влак уна лийыныт. Вес шошо-кеҥежымат (апрель гыч сентябрь марте) тыгай кас-влак лийыт.

А тенй кеҥежымак «МАРИКИНО» студийын ик эн кӱжгӧ пашаже вораҥдаралтын – у марий художественный фильмым войзеныт. Тудо «Ял ӱмбалне мужыр йӱксӧ» маналтеш, да сценарий Геннадий Гордеевын тыгаяк лӱман пьесыж почеш возалтын. У кином ыштымаште пеҥгыде команде тыршен: режиссёр-постановщик да сценарист – РФ сымыктышын сулло пашаеҥже Олег Иркабаев-Этайн, актёр-влак – Зинаида Долгова (Качырий) ден Иван Смирнов (Шумат), Светлана Никитина (Овдачий) ден Олег Кузьминых (Микыта), Людмила Фёдорова (Аня) ден Виктор Апталиков (Сану), Надежда Смирнова (Зина) ден Александр Кожевников (Витя) да моло пашаче еҥат. Палемдыман: у кино Кужеҥер район Йывансола велне сниматлалтын.
30 ноябрьыште кинон презентацийже М.Шкетан театрыштак лиеш. А 9 ноябрьыште сылне касыш пагален ӱжыт! Кас оҥай лияш сӧра: тӱрлӧ семӱзгар почеш марий муро-влак йоҥгаш, спектакльла ден у кино гыч ужаш-влакым ончыкташ тӱҥалыт. А эн тӱҥжӧ, пӧлек-влак модылтыт. Пелен «Вис-вис пушан орлыкем» DVD-дискым намияш ида мондо.

«МАРИКИНО» студийын ончыкылыкланат пашаже моткоч шуко, ятыр сай шонымашым илышыш шыҥдараш шона. Темлымашдам, йодмашдам возыза электрон почтыш: marikino@bk.ru. Сайт: www.marikino.ru.

Автор: Эльвира Куклина.

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.