«Колумб лудмаш» оласе конкурс
Вход на сайт
2018 ий 18 майыште Валентин Колумб лӱмеш республикысе йоча ден самырык-влаклан книгагудышто «Колумб лудмаш» конкурс эртен.
Тений тиде конкурсыш оласе школла гыч 26 еҥ ушнен. Нуно кум тӱшкалан шелалтыныт:
- 12 ияш марте;
- 13 гыч 18 ияш марте;
- 18 ий деч кугурак-влак.
Кажне тунемше почеламутым чоным почын лудын, эсогыл южо гана кумылат тодылалт каен. А теве азербайджан ӱдыр Сейран Агамалиеван «Шояк Павыл» почеламутым лудмыж годым куаныме да кугешныме шуын. Сейран туге чаплын йоҥгалтарен да модын пуэн – шыргыжалаш веле кодын. Кажне ончышо айдемын кумылжым савырен кертын. Марий огыл улмыжым палыде, чылт марий ӱдырлан шотлаш лиеш.
Йоча-влак пеш уста лийыныт, садлан аклыше комиссийлан эн сайжым ойыраш неле лийын. Комиссийыш поэт, журналист, Россий Писатель ушемын еҥже– Геннадий Сабанцев-Ояр, Марий Эл Республикын сулло журналистше, «Ямде лий» газетын тӱҥ редакторжо Лидия Семёнова пуреныт.
Тыге сеҥышыш лектыныт:
12 ияш марте:
1 вер – Краснова Кристина (13-шо №-ан школ);
2 вер – Клипинен Ингира (Калыкле президент школ);
3 вер – Зыкова Татьяна (А.С. Пушкин лӱмеш –ше №-ан гимназий).
13 гыч 18 ияш марте:
1 вер – Агамалиева Сейран (3-шо №-ан школ);
2 вер – Васильева Татьяна (Калыкле президент школ);
3 вер – Кугергина Ирина (21-ше №-ан школ).
18 ий деч кугурак-влак коклаште икымше Екатерина Кириллова (И.С. Палантай лӱмеш Марий Республикысе тӱвыра да сымыктыш колледж) лийын.
Сеҥыше-влак июнь тылзыште Морко районышто эртаралтше республике кӱкшытан «Колумб лудмаш» конкурсышто шке вийыштым тергаш каят.
Чаманен каласыме шуэш, Йошкар-Олаште тынар шуко школ улмо годым, конкурсыш ушнышо-влак шагалрак улыт. Туге гына ӱшанен кодына: Морко районышто «Колумб лудмаш» конкурсышто лудшо-влак молгунамсе семынак шукын лийыт.
Автор: Вероника Мустаева.
#МариАрслан #мари #Поэзий #Нацполитика #Сылнымут_Поэзия
- Эльвира Куклина
- пн, 05/21/2018 - 14:13
