2018 ий 24 февральыште Татарстан кундем Буймо селаште Шочмо Элым аралыше-влакын пайремыштлан пöлеклатше волейбол турнир эртыш. Таҥасымаш ты поселений вуйлатышын призше лÿмеш лие. А тиде кечын тале, виян марий рвезе-влакым иктыш чумыраш Буймо школ вуйлатыше Эдуард Михайлов да чолга пöръеҥ Максим Макаров шонен пыштеныт.

Тыге Агрыз район марий-влак волейболла модаш погынышт. Нунын деке Ныргынды ял (Одо кундем) рвезе-влак ушнышт. Чылаже индеш команде икте-весе коклаште таҥасыш. Буймо кыдалаш школын спортзалышкыже еҥ тÿшкан погыныш, болельщик-влак йолташ, родо-влак верч чон почын, куанен кычкырышт.

Икмыняр шагат тыршен кучедалмек, сеҥыше палемдалте. Эн виян Буймо ял поселений спортсмен-влак лийыч!

«Марий самырык-влак тазалыкым пеҥгыдемышт манын, спорт пайремым эратараш шонен пыштышна. Волейбол, ече дене таҥасымаш-шамыч кажне ийын эртат. Ӱшанена, вес ийын эше шукырак команде лиеш, вес регион гычат волейболла модаш йöратыше марий-влак толыт. Чон почын вучена! Полышымат уло кумылан вашлийына», - ойла Максим Макаров.

Автор: Любовь Михайлова.
#МариАрслан #Новости #РеспубликаТатарстан #Семья #Мари

• Новости культуры
• Новости Республики Марий Эл
• Новости регионов и стран