26-28 сентябрьыште Саранск олаште Российысе финн-угор калык-влакын V съездышт эртен. Тунамак да туштак Финн-угор универститет-влак ассоциацийын погынымашыже лийын. Вуз-влакым вуйлатыше-влак национальный тӱвырам вияҥдымаште финн-угор университет-влакын рольышт нерген ойленыт. Марий кугыжаныш университетын пашаж дене ректорын сомылжым шуктышо Михаил Швецов палдарен. Чыла тиде Финн-угор сымыктышын да калык усталыкын «Финн-угор транзит: родо-тукым вашлиймаш» тӱнямбал фестивальыштын гала-концертше дене иктешлалтын. Ончышо-влаклан моткоч сай шарнымашым Марий Эл гыч Россий Федерацийын сулло артистше, Марий Элын калык артистше Славик Асмаевын вуйлатыме «Цармис» ансамбльже коден.

«Ансамбль эре гастроль дене коштеш, мастарлыкшым шуара. Озаҥышке Универсиадыш, Ульяновскыш «Студент шошо» фестивальыш, Чебоксарыш, а ынде Мордовийышкат «транзитыш» мемнам ӱжыныт, - ойла Илья Якимов, ансамльын участникше. Илья - Куженер район Йывансола ялын эргыже. Кызыт 2-шо курсышто Национальный культур да культур кыл институтышто (ИНКиМК) шинчымашыжым нӧлта.

«Саранскыште мемнам пеш сайын вашлийыч. «Надежда» лӱман пансионатыште вераҥдышт. Илыме йӧн сай ыле. А фестивальын концерт программыштыже чылаже 18 номерым ончыктышт. Мемнан ансамбльна мучаште калык ончыко лекте да 12 минут жапыште оҥай да мастар куштымаш дене чылаштымат куандарыш», - умбакыже каласыш Илья. Выступатлыше-влак коклаште йолташ кумыл озаланен. Фестивальым шарналтен, Илья тыгай ойым ешарыш: « Артист-влак ик еш гай иленыт. Кӧ мый улам манын, иктат оҥжым кадыртен коштын огыл. Номерлан ямдылалтме, икте-весылан полыш кӱлмӧ годым кидым пуаш ямде лийме».

«Цармис» ансамбль 3 октябрьыште ынде Йошкар-Олаште Калык хореографийын I тӱнямбал финн-угор фестивальыштыже шке мастарлыкшым ончыктен…

Автор: Андрей Кошаев.

• Чыла V Финн-угор съезд нерген