20 сентябрьыште Йошкар-Оласе Чарла кремльыште "Чон ӱжеш Марий паркыш" каныме кас эртен. Тудо ты гана самырык пагытлан пӧлеклалтын да тыге шошо марте чеверласен.

Касым самырык мурызо-влак сӧрастареныт: Лилия Петухова, Виктория Тихонова, Мария Морозова, Артур Ефремов, Вадим Краснов. А ты касын эше ик ойыртемже - "Ял ӱмбалне мужыр йӱксӧ" у марий фильм гыч самырык актёр-влакын мурымышт. Людмила Фёдорова ден Виктор Апталиков лач фильм гычак сылне муро-шамычым йоҥгалтареныт.

"МАРИКИНО" студий тыгай кас-влакым вес ийынат, чыла сай лиеш гын, апрель гыч эртараш тӱҥалеш. Вучен кодына да чыла сайым гына тыланена!