Пытартыш жапыште финн-угор театр-влак национальный драматургий шотышто йодышым чӱчкыдынак тарватат. Чыланыштым лач икте тургыжландара: шочмо йылме дене возышо самырык драматург-влак уке улыт. Тиде йодышым «Майатул» фестивальыштат тарватыме ыле. Тӱҥалтыш ошкыл семын возышо-влаклан иктаж семинарым але курсым эртараш кутырен келшыме.

Ты шотышто М. Шкетан лӱмеш Марий кугыжаныш драме театрын куандарыше увержат уло. 2017 ий 23-25 июньышто финн-угор самырык драматург-влаклан «Усталыкым вияҥде» курс лиеш. Тиде проект М.А. Кастрен Обществын полшымыж дене шукталтеш.

Весымат палемдыман, мемнан театр пелен усталык лабораторий пашам ышта. Моло родо-тукым калыкна дене таҥастарымаште ме мыняр-гынат ончылно улына, шочмо йылме дене возаш кумылан-влак шукырак улыт. Тӱҥ шотышто нуно чыланат тиде курсышко ушнат. Тылеч посна участник-влакым Коми, Удмуртий Республикыла да Пермь кундем гыч вучена.

Автор: Татьяна Светлакова, театрын завлитше.
#МариАрслан #театр #спектакль #культура
#искусство #сцена #артист #йошкарола #МарийЭл

• Тӱвыра увер
• Новости культуры
• Афиша