Паша айдемым сӧрастара
Вход на сайт
Паша айдемым сӧрастара, а ура чонан еҥ кеч-могай пашамат ворандара. Марий Оньыжа, Марий Элысе Кугыжаныш Погын вуйлатышын алмаштышыже Анатолий Николаевич Иванов 4 сентябрьыште 66 ийым темыш. Тиде кечын тудым шуко йолташыже, палымыже да палыдымыжат саламлаш вашкышт. Вет, чынже денак, поро чонан Морко эрге шочмо марий калыкшылан ятыр полшен: кеч-кунамат посна еҥын илыш пӧрдемжым умылен мошта, кертмыж семын неле-йӧсым сеҥаш йӧным кычал муэш.
Анатолий Иванов Морко район Изи Корамас ялыште шочын-кушкын. Кӱшыл шинчымашым А.М.Горький лӱмеш Марий политехинститушто налын, Горькийысе кӱшыл парт школым пытарен. Паша корныжо Марий машиностроитель завод гыч тӱҥалын. Вара армийыште служитлен. КПСС-ын Йошкар-Оласе горкомыштыжо пропаганде да агитаций пӧлкам вуйлатен, Калык депутат-влакын Йошкар-Оласе совет председательын алмаштышыже лийын. Российысе Сбербанкын «Марий Эл» банкыштыже пӧлкам вуйлатен. Марий Эл Президентын Администрацийыштыже тыршен. Марий Эл тӱвыран сулло пашаеҥже лӱмым сулен.
Мер Каҥашын еҥже-влак Анатолий Николаевичым сылне пайремже дене эше ик гана шокшын саламлат да пеҥгыде-пеҥгыде тазалыкым, волгыдо вий-куатым, шӱм-чон ласкалыкым, эреак кугу-кугу пиалым, сеҥымашым, кужу-кужу ӱмырым тыланат. Пагалыме Анатолий Николаевич, умбакыжат марий калыклан ӱшанле эҥертыш лийын кодса!
Информацийым http://mer-kanash.ru сайт гыч налме.
- Эльвира
- ср, 09/04/2013 - 22:37
- Войдите, чтобы оставлять комментарии