Мер Каҥаш: Вуйвер кок тӱҥ йодышым каҥашыш

Вход на сайт

29 августышто Мер Каҥашын вуйверже чумыргыш, кок тӱҥ йодышым каҥашышт. Килемар районысо Мер Каҥаш активын 2012-2013 ийласе пашаж нерген Мер Каҥашын ту кундемысе пӧлкажын еҥже, Арды ял шотан илемым вуйлатыше Надежда Алатайкина каласкалыш. Кокымшо йодыш Российысе финн-угор калык-влакын визымше погыныштлан ямдылалтме паша нерген ыле.

IMG_1014-.jpg

Икымше йодыш почеш Надежда Алатайкина шке кундемыштыже ыштыме сомыл дене палдарыш. Тудо, тӱҥ шотышто, ГЭС-ым нӧлталаш шонымо дене кылдалтше йодыш-влакым кузе решатлыме нерген ойлыш. Тыгак верысе чолга еҥ-влакын пашашт нерген палемден кодыш. Теве тусо «Раздолье» турист комплекс таче республикыште гына огыл, а вес кундемлаштат палыме да канаш йӧратыме верыш савырнен шуктен. Тиде комлекслан кӧра калыклан паша вер уло, вольыкымат ончен, шылжым да садпакчасе саскамат тушко ужалаш лиеш.

Ий гыч ийыш июль тылзыште «Кугезе мланде» фольклор-этнографий фестиваль эрта. Арды селаште кидпаша, ӱдырамаш клуб-влакат улыт. Верысе депутат-шамычат ӧрдыжеш огыт код, мутлан, шукерте огыл таве-влакым олмыкташ шийвундым ойыреныт.

IMG_1011-_0.jpg

Тусо школлаште, чаманаш логалеш, марий йылмым йоча-влаклан шочмо огыл, а кугыжаныш йылме семын гына туныктат. Арды селасе маровед ты шотышто моткоч тургыжлана. Вуйверыш погынышо-влак, тыгай ой-каҥашым пуышт: марий йылмым туныктышым арален кодымо гын, тиде сай – ынде ача-ава дене утларак кугу умылтарымаш пашам виктарыман.

Н.Алатайкинан ойлымыж почеш, верыште чолга еҥ ятыр, тӱрлӧ мероприятийым эртараш самырык-влакат уло кумылын полшат. Лачак Арды селаште специалист-влак гына огыт сите!!!

IMG_1018-.jpg

Кокымшо йодышым каҥашыме годым теве мом палемдышт: Российысе финн-угор калык-влакын V погынышкыжо (Мордовийын Саранск олаштыже) Марий Эл гыч 22 еҥан делегаций 26 сентябрьыште корныш лектеш. Республике деч тӱҥ докладым Марий Оньыжа Анатолий Иванов ямдыла. Кажне секцийыште марий делегаций деч икмыняр доклад лиеш. Чылаже вич секций пашам ыштышаш: «Йылме. Шанче. Шинчымаш»; «Тӱвыра. Сылнымут. Кызытсе информаций технологий»; «Тазалык. Демографий. Еш»; «Глобализаций. Идентичность. Йӱла» - самырыктукым дене кылдалтше йыргешке ӱстел.

А Вуйверын погынымашыштыже кок тӱҥ йодыш деч посна эше икмыняр изирак йодышым каҥашышт. Тыге Марий Эл Радион редакторже Наташа Пушкина Юл кундемысе кугыжаныш технологический университетын туризм дене кылдалтше пӧлкаштыже марий йылмым туныкташ кӱлмӧ нерген ойлыш. Тидым молат сайлан шотлышт, тушко серышым возаш пеҥгдемдышт. Вес вуйвер марте (19 сентябрьыште) С.Г.Чавайнын шочмыжлан 125 ий темме лӱмеш пӧлеклалтше «Калык верч тыршымаш» медальым пуаш кандидат-влак нерген шоналташ кӱлмӧ нергенат пунчальыч. Мер Каҥашын еҥже-влаклан ялысе школлашке лектын кошташ да тушто марий йылмым туныктымо ситуацийым эскерен шогаш кӱлеш манын, иктешлышт.

Автор: Эльвира Куклина.

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.