Сценыште – 30 ий!

Вход на сайт

ffsquJhBlOM_0.jpgТӱвыра аланыште Россий Федерацийын сулло, Марий Элын калык артистше Иван Смирновын лӱмжӧ моткоч палыме. Тудын усталык пашаже кок шӧрынан. Икымшыже – драматический артист, весыже – мурызо. Кок семынжат тудым калык йӧратен онча. У Торъял кундем Кугу Пызак ялын эргыже сценылан 30 ийым пӧлеклен. 2017 ий 27 январьыште 18 шагатлан Шкетан лӱмеш Марий кугыжаныш драме театрыште кугу концертым эртара.

Иван Смирновын репертуарыштыже 100 наре муро погына. Проста кумылан улмыж дене калыкын йӧратымашыжым шукертак сулен. Илышыште моткоч тыматле айдеме, а сценыште тудо тӱрлӧ. Тӱрлӧ образыште лектеш. Сандене калык тудым куанен вуча. Вуйыш шляпам шынден, шем очким чиен «Москвашкат каен кертеш», мотор ош костюмым чиен самырык артист-влак дене пырля пеш куштылгын кушталтенат колта але гитарым кучен лектеш.

Спектакль нерген ойлаш гын, тӱҥалын чылажат тӱшкан модмаш гыч. Икымше кугу рольжо Миклай Рыбаковын «Эргымлан кузык» (1988) трагикомедийыштыже Микин рольжо лийын.

Теве «Салика» спектакльым налаш гын, ончыч Эчукым модын гын, вара, Полат Акпай лийын, Саликам марлан налаш тӧчен. Кызыт Ози Кузим модеш. Тиде роль денак тудо фильмышкат возалтын. Но эн кугу да виян рольым Александр Пудинын «Ой, куница играет…» пьесыж почеш шындыме «Ой, луй модеш…» спектакльыште Йыван Кырлан рольжым чоҥен.

Лишыл жапыште, 22 январьыште, «Пысман корем» спектакль лиеш. Тӱҥ рольышто – Иван Смирнов. А концертым эртарымаш поро йӱлашке савырнен. Кызыт тудо у муро-влакым воза, йӧратыме зрительже-влак дене вашлиймашлан ямдылалтеш. 30 ияш усталык касшым 27 январьыште 18 шагатлан Шкетан театрыште эртара. Пагален вучена!

Автор: Татьяна Светлакова, театрын завлитше.
#МариАрслан #театр #спектакль #культура
#искусство #сцена #артист #йошкарола #МарийЭл

27.01.17.jpg

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.